अमेरिकाका शीर्ष सैन्य अधिकृतले चिनियाँ समकक्षीलाई दुईपटक फोन गरेर चीनविरुद्ध तत्कालीन राष्ट्रपति डोनल्ड ट्रम्पले युद्ध शुरू गर्न सक्ने चेतावनी दिएको एक नयाँ पुस्तकमा खुलासा गरिएको छ । 

पत्रकारद्वय बब वूडवार्ड र रोबर्ट कोस्टाको पुस्तक पेरिलका केही अंश द वाशिङटन पोस्ट दैनिकमा छापिएको छ । त्यसमा उल्लेख भएअनुसार, राष्ट्रपति निर्वाचन हार्न लाग्दा ट्रम्पले चीनविरुद्ध युद्ध शुरू गर्न खोजेका थिए । 

अमेरिकाको जोइन्ट चीफ्स अफ स्टाफका अध्यक्ष जनरल मार्क मिल्लेले सन् २०२० को अक्टोबर ३० मा चिनियाँ जनमुक्ति सेनाका जनरल ली च्वोचङलाई फोन गरेका थिए । त्यतिखेर चुनाव आउन चार दिन थियो । 

उनले जनवरी ८ मा पनि फोन गरेका थिए । ट्रम्पका समर्थकहरूले अमेरिकी संसद् भवनमा आक्रमण गरेको दुई दिन बितेको थियो । 

ती फोनकलहरूमा मिल्लेले लीलाई अमेरिका स्थिर रहेको र चीनमाथि आक्रमण नगर्ने अनि आक्रमण भइहालेछ भने पनि समकक्षीलाई समयअगावै खबर गर्ने आश्वासन दिएको लेखिएको छ । 

पेरिल नामक पुस्तक तयार पार्न २०० स्रोतसँग अन्तर्वार्ता लिएको वूडवार्ड र कोस्टाले बताएका छन् । पुस्तक अर्को साता सार्वजनिक गरिनेछ । 

मिल्लेले सीआईएकी तत्कालीन निर्देशक जिना ह्यास्पल र राष्ट्रिय सुरक्षा निकायका प्रमुख पल नाकासोनलाई ट्रम्पले गलत काम गर्न सक्ने भएकाले सतर्क रहन समेत भनेका थिए । 

‘मिल्लेले आफ्नो अधिकारक्षेत्रभन्दा पर गएर काम गरेको र आफैंमा असाधारण शक्ति खिचेको केहीले भन्न सक्छन्,’ लेखकहरूले टिप्पणी गरेका छन् । 

ट्रम्पले एक बयान जारी गरेर यो झूटो कथा भएको बताए । यो साँचो भएमा मिल्लेलाई देशद्रोहको मुद्दा चलाउनुपर्ने उनको भनाइ छ । 

‘अभिलेखका लागि भनौं, मैले चीनमाथि आक्रमण गर्ने सोच राखेकै थिइनँ,’ ट्रम्पले बताए । 

मिल्लेको कार्यालयले यस विषयमा टिप्पणी गर्न अस्वीकार गरेको छ ।