नेकपा एमालेका अध्यक्ष केपी शर्मा ओलीले एमालेलाई माहुरी र माधव नेपालको पार्टीलाई झिँगाको संज्ञा दिएका छन् ।

रुपन्देहीमा बुधवार अगुवा कार्यकता भेलालाई सम्बोधन गर्दै ओलीले भने, ‘एमाले फूलमा बस्ने माहुरी हो । माधव नेपाल र उनको पार्टी फोहोरमा बस्ने झिँगा हो । अब तपाईं आफैं रोज्नुहोस् । फूलको बगैंचामा बस्ने कि फोहोरको डुंगरमा बस्ने ?’

ओलीले कार्यकर्तालाई निराश नबनी एमालेमा बसेर मौरीको साथमा लागेर फूलबारीमा लाग्न आग्रह गरे । उनले अबको समय एमालेको भएको भन्दै कार्यकर्तालाई निराश नहुन आग्रह गरे ।

अध्यक्ष ओलीले एमाले आकाश जस्तै ठूलो र फराकिलो रहेको भन्दै एमालेलाई कसैले रोक्न नसक्ने बताए । ‘कसैले एमालेलाई फुटाउन वस्त्र समेत फालेर तमासा देखाए,’ पूर्व प्रधानमन्त्री समेत रहेको ओलीले भने, ‘एमाले आकाशबाट पर्ने पानीलाई रोेक्न नसकेजस्तै हो । कसैले रोक्न सक्दैन । केही व्यक्तिवादी र स्वार्थकेन्द्रित कार्यकर्ताले पार्टी छाड्दैमा एमालेलाई कुनै असर पर्दैन ।’

कसैले आन्दोलनका उपलब्धिलाई छाडेर जाँदैमा निराश नहुन कार्यकर्तालाई ओलीले आग्रह गरे । ‘एमाले फुटेको होइन । कार्यकताले दुःख मनाउ गर्नु पर्दैन । पिलो निचोरेर हलुंगो भएजस्तै हो,’ उनले भने ।

एमालेलाई विजयी यात्राको तयारीमा लाग्न कार्यकर्तालाई ओलीले आग्रह गरे । माधव नेपालले एमालेमाथि बन्चरो प्रहार गरेको ओलीको आरोप छ ।