तेब्बर कैदीबन्दीले कारागारमा संक्रामक रोगको जोखिम

तेब्बर कैदीबन्दीले कारागारमा संक्रामक रोगको जोखिम
प्रतिकात्मक तस्वीर

जिल्ला कारागार बैतडीमा क्षमताभन्दा तेब्बर कैदीबन्दी हुँदा संक्रामक रोगको जोखिम बढेको छ ।


Advertisement

२५ जनाको क्षमता रहेको कारागारमा हाल ७५ कैदीबन्दी छन् । तीमध्ये ४२ कैदी र बाँकी थुनुवा रहेका कारागार प्रमुख अनिल तिवारीले जानकारी दिए ।


Advertisement

तेब्बर कैदीबन्दी हुँदा सरुवा रोगको पनि जोखिम बढेको छ । ‘भौतिक दूरी कायम हुने त कुरै छैन, कोरोनाको पनि जोखिम छ,’ उनले भने, ‘कारागारभित्र ठाउँ नभएर टेण्ट हालेर राखेका छौं, व्यवस्थापनमा निकै चुनौती छ ।’

‘कारागार भित्रैको कम्पाउन्डमा २ टेन्ट हालेका छौं, त्यसभित्र ८ शय्या लगाएर १३ जनालाई त्यहाँ बसोबासको व्यवस्था गरेका छौं,’ प्रमुख तिवारीले भने, ‘व्यवस्थापनमा चुनौती थपिएको छ, ठाउँ अभावमा एउटै शय्यामा ३ कैदीबन्दी सुत्ने गरेका छन् ।’


Advertisement

कैदीबन्दीलाई शौचालय प्रयोग र सरसफाइका लागि समेत समस्या हुँदै आएको छ । उनीहरूमा कोरोना संक्रमणको जोखिम बढेकाले बाह्य भेटघाट पनि बन्द गरिएको छ । ‘सबैले खोप लगाए पनि जोखिम बढ्ने भएकाले बाहिरी भेटघाट बन्द गरेका हौं,’ प्रमुख तिवारीले भने, ‘विशेष परिस्थिति तथा मुद्दासँग सम्बन्धित भेटघाट भए, ७२ घण्टाभित्रको पीसीआर रिपोर्ट र कोरोना खोप लगाएको कार्ड हेर्ने गरेका छौं ।’

जिल्ला अस्पतालका प्रमुख डा. वसन्तराज जोशीले पनि कारागारमा संक्रामक तथा सरुवा रोगको जोखिम रहेको बताए । उनले भने, ‘थोरै मान्छे बस्नुपर्ने ठाउँमा बढी मान्छे लामो समयसम्म बस्दा जोखिम निकै हुन्छ ।’ यस्तो ठाउँमा क्षयरोग तथा श्वासप्रश्वास सम्बन्धी समस्या बढी देखिने सम्भावना हुन्छ । 

पुरानो र जीर्ण भवन पुनर्निर्माण नहुँदा सुरक्षा चुनौती पनि थपिएको छ । विक्रम संवत् २०४० सालमा निर्माण गरिएको कारागार पुनर्निर्माण नहुँदा जीर्ण बनेको हो ।  

नयाँ भवन निर्माणका लागि कारागार व्यवस्थापन विभागमा लागत अनुमान सहितको योजना पठाइए पनि कहिले बन्ने भन्ने टुंगो छैन । प्रमुख तिवारीले भने, ‘नयाँ भवन बन्ने कुराको टुंगो लागेको छैन, ४ करोडभन्दा बढीको लागत इस्टमेट गरेर पठाइएको थियो ।’

कारागार सुरक्षाको जिम्मा नेपाली सेनाले लिएको छ । 

कमेन्ट गर्नुहोस्