चीनले दक्षिण चीन सागरमा पुगेको एक जर्मन युद्धपोतलाई बन्दरगाहमा आउन रोक लगाएको जर्मनीको परराष्ट्र मन्त्रालयका एक प्रवक्ताले बताएका छन् । 

बायर्न फ्रिगेटलाई चीनले रोकेको जानकारी उनले दिए तर कुन चिनियाँ बन्दरगाहमा रोकिएको बताएनन् । उक्त जहाज गत महिना जर्मनीबाट दक्षिण चीन सागरमा ६ महिनाको मिसनका लागि हिँडेको हो । 

चीनको परराष्ट्र मन्त्रालयका प्रवक्ता चाओ लिजियानलाई यस विषयमा सोध्दा यस क्षेत्रबाहिरका मुलुकहरूले सिर्जनात्मक भूमिका निर्वाह गर्ने र शान्ति तथा स्थिरता कायम गर्ने क्षेत्रीय मुलुकहरूको प्रयासलाई सम्मान गर्ने आशा चीनले गरेको बताए । 

चीनको रक्षा मन्त्रालयले यस विषयमा टिप्पणी गरेको छैन । 

चीनले दक्षिण चीन सागरको लगभग सबै भागमा नियन्त्रण कायम गरेको छ र कृत्रिम टापुहरूमा सैन्य आउटपोस्ट बनाएको छ ।