३८ क्विन्टल सुन तस्करी मुद्दा : आजबाट शुरू भयो अन्तिम सुनुवाइ

उत्तम पोखरेल
उत्तम पोखरेल

पोखरेल लोकान्तर डट्कमका प्रदेश १ प्रतिनिधि हुन् ।

३८ क्विन्टल सुन तस्करी मुद्दा : आजबाट शुरू भयो अन्तिम सुनुवाइ

३८ क्विन्टल सुन तस्करीसम्बन्धी मुद्दामा अन्तिम सुनुवाइ शुरू भएको छ । 


Advertisement

जिल्ला अदालत मोरङका न्यायाधीश भरत लम्सालको इजलासमा आइतवारदेखि सरकारी वकिलका तर्फबाट बहस शुरू भएको हो । 


Advertisement

सरकारी वकिलका तर्फबाट मोरङका सहायक जिल्ला न्यायाधिवक्ता मनिषबाबु पोखरेलले अवैध सुन चोरी निकासी र पैठारीका विषयमा बहस गरेका छन् । ७७ जना प्रतिवादी रहेको मुद्दाको अवैध सुन चोरी निकासी र पैठारी शीर्षकमा नेपाल प्रहरीका एसपी विकासराज खनाल र डीएसपी प्रजित केसीलगायत ३ जनालाई भने प्रतिवादी बनाइएको छैन । 

जिल्ला अदालत मोरङका सूचना अधिकारी राजेन्द्रप्रसाद धमलाले मुद्दामा सरकारी वकिलको बहस सोमवारसम्म जारी रहने जानकारी दिए ।  


Advertisement

मोरङ उर्लाबारीका गोरे भनेर चिनिने चुडामणि उप्रेतीलाई मुख्य अभियुक्त बनाइएको मुद्दा असोज ७ गतेदेखि सुनुवाइका क्रममा रहेर हेदाहेर्दैमा स्थगित गरीएको थियो ।  

तस्करी गरेर दुबईबाट ल्याएको साढे ३३ किलो सुन गायब बनाएको आरोपमा गोरेसहित उनको समूहले करेन्ट लगाएर यातना दिँदै २०७४ फागुन १८ मा उर्लाबारी १ मा सनम शाक्यको हत्या गरेको थियो । 

हत्यापछि धरानमा एक रात राखेर शाक्यको शव विराटनगर ल्याइएको थियो । शव राखिएको बा १२ च ५९६३ नम्बरको स्कोरपिओ र मे १ च ५३९८ नम्बरको कारसहित प्रहरीले चालकहरू मोहन काफ्ले, टेकराज मल्ल ठकुरी तथा कृष्ण भनिने नरेन्द्र कार्कीलाई शुरूमा पक्राउ गरेको थियो । त्यो समयमा गोरे भने फरार थिए । पछि उनी पक्राउ परेका हुन् । अदालतले उनलाई पुर्पक्षका लागि थुनामा राख्न आदेश दिएको छ । 

सुन तस्करी प्रकरणमा नेपाल प्रहरीका पूर्वडीआईजी गोविन्दप्रसाद निरौला, एसएसपी श्यामबहादुर खत्री, दिवेश लोहनी, एसपी विकासराज खनाल, डीएसपीहरू सञ्जयबहादुर राउत, प्रजित केसी, सई बालकृष्ण सञ्जेलसमेत मुछिएका छन् ।  प्रतिवादी बनाइएकामध्ये खत्री र राउत थुनामा रहेका छन् । बाँकी प्रहरी अधिकारी भने उच्च अदालत विराटनगरको आदेशबाट छुटिसकेका छन् । 

सरकारी वकिल कार्यालय मोरङले २०७५ वैशाख १९ गते जिल्ला अदालत मोरङमा ‘आपराधिक समूह स्थापना र सञ्चालन गरी सुन चोरी पैठारी र चोरी निकासीको अवैध कारोबार, अपहरण तथा शरीर बन्धक र कर्तव्य ज्यान’ गरेर चार वटा शीर्षकमा मुद्दा दायर गरेको थियो । 

मुद्दामा १७ अर्ब एक करोड ८० लाख ७१ हजार ४०० रूपैयाँ बराबरको ३७ लाख ९९ हजार ५६३ ग्राम (करीब ३८ क्विन्टल) सुन अवैध रुपमा आयात गरिएको दाबी गरिएको छ ।

शुरूमा ६३ जना मात्रै प्रतिवादी रहेको मुद्दामा तीन पटकसम्म पुरक अभियोग दर्ता गर्दा प्रतिवादी ७७ पुगेका छन् । ५५ जना प्रतिवादी पक्राउ परे पनि २२ जना अझैसम्म फरार छन् ।

उत्तम पोखरेल
उत्तम पोखरेल

लेखकबाट थप...

कमेन्ट गर्नुहोस्