तालिबान सरकारले अफगान नागरिकहरूमाथि कठोर नियम लादिरहेको बेलामा उसकै लडाकूहरू चाहिँ मोजमस्ती गरिरहेको पाइएपछि नेतृत्व रुष्ट भएको छ । 

नेताहरूले लडाकूहरूलाई पर्यटन स्थलमा गएर रमाइलो नगर्न र सेल्फी खिच्दै सामाजिक सञ्जालमा नहाल्न भनेको छ । यसो गर्दा तालिबानको छविमा आँच आउने नेताहरूको भनाइ छ । 

तालिबान लडाकूहरू ड्युटी नपर्दा हातमा बन्दूक लिएरै रमाइलो गर्ने ठाउँहरूमा पुगिरहेका हुन्छन् । अफगानिस्तानका अन्य भागबाट पनि लडाकूहरू काबुल आएर मोजमस्ती गर्ने गरेका छन् । त्यसैले तालिबानका रक्षामन्त्री मोहम्मद याकूबले लडाकूहरूलाई हप्काएका छन् । 

याकूबले लडाकूहरूसँग कुराकानी गर्दै जे काम गर्न लगाएको हो त्यही मात्र गर्न भनेका छन् । सयौं शहीदको बलिदानका कारण अहिले आफूहरू सत्तामा पुगेको र तिनको अपमान हुने गरी मोजमस्ती गर्न नहुने याकूबको भनाइ छ । 

सेल्फी अप्लोड गर्नेहरूले अफगानिस्तानका संवेदनशील स्थानलाई पनि सार्वजनिक गर्न सक्ने जोखिम भएकाले याकूब रिसाएका हुन् ।