कोलम्बियाका फार्क विद्रोही समूहको आक्रमणमा पाँच सर्वसाधारणको मृत्यु भएको सरकारी अधिकारीहरूले सोमवार बताएका छन् ।

यो घातक घटना नारिनोको दक्षिणी भागमा पर्ने टुमाकोको एक ग्रामीण क्षेत्रको सार्वजनिक प्रतिष्ठानमा भएको सेनाले जनाएको छ । 

सन् २०१६ मा क्रान्तिकारी सशस्त्र बल फार्क (एफएआरसी) सँग शान्ति सम्झौतामा हस्ताक्षर भए यता यस सशस्त्र समूहबाट बारम्बार आक्रमण हुँदै आएको पाइन्छ । एक गाडीमा प्रतिष्ठान आइपुगेका फार्क विद्रोहीहरूले अन्धाधुन्ध गोली चलाएका कोलम्बियाको सेनाद्वारा जारी गरेको विज्ञप्तिमा जनाइएको छ । 

दुई जनाको घटनास्थलमै मृत्यु भएको थियो भने गोली लागेका अरू तीन जनाको अस्पतालमा मृत्यु भएको बताइएको छ । यस घटनामा परी अन्य १२ जना घाइते भएका छन् ।