विशेष अदालत काठमाडौंले कर फर्छ्यौट आयोगका सदस्य एवं आन्तरिक राजश्व विभागका तत्कालीन महानिर्देशक चुडामणि शर्मालाई ५० लाख धरौटीमा छाड्न आदेश दिएको छ । 

विशेष अदालतका न्यायाधीशद्वय अब्दुल अजिज मुसलमान र नित्यानन्द पाण्डेयको इजलासले सोमवार शर्मालाई ५० लाख धरौटीमा छाड्न आदेश दिएको हो । कर फर्छ्यौट आयोगका अध्यक्ष लुम्बध्वज महत, सदस्य उमेशप्रसाद ढकाल ५० लाख धरौटीमा रिहा भएका थिए । 

कर फर्छ्यौटका नाममा राजस्व चुहावट गरी भ्रष्टाचार गरेको अभियोगमा अख्तियार दुरुपयोग अनुसन्धान आयोगले कर फर्छ्यौट आयोगका पदाधिकारीविरुद्ध एक अर्ब ३३ लाख २० हजारको बिगो, जरिवाना र कैदको माग गरी भ्रष्टाचार मुद्दा दायर गरेको थियो ।

अख्तियारले गएको असार ९ गते कर फर्छ्यौट आयोगका पदाधिकारी उपर भ्रष्टाचार मुद्दा दायर गरेको थियो ।