नेपाल पुलिस क्लब र गलकोट स्पोर्टस क्लब छैटौं एनभीए महिला तथा पुरुष क्लब च्याम्पियनशिप २०७८ का २ खेलमा जीत निकाल्दै अंक तालिकाको शीर्ष स्थानमा रहेका छन् ।

पुलिसले दोस्रो दिन मणिमुकुन्द भलिबल क्लबलाई ३–० को सोझो सेटमा पराजित गर्दै अंक तालिकामा पहिलो स्थान बनाउन सफल भएको हो ।

पुलिसले मणिमुकुन्दलाई २१–१४, २१–१५ र २१–१७ ले पराजित गरेको छ । प्रतियोगिताको पहिलो दिन उद्घाटन खेलमा पनि पुलिसले दावाँली मिलन क्लबलाई पराजित गरेको थियो । पुलिस समूह ‘बी’मा ६ अंकका साथ पहिलो स्थानमा रहेको छ ।

गलकोट स्पोर्टस क्लबले पनि आफ्नो खातामा ६ अंक जोडेको छ । समूह ‘ए’मा रहेको गलकोटले प्रतियोगिताको पहिलो दिन बागमती प्रदेशमाथि जीत निकाल्दै ३ अंक जोडेको थियो । दोस्रो दिन पनि गलकोटले २ नम्बर प्रदेशमाथि जीत निकाल्दै थप ३ अंक जोडेको छ ।

गलकोटले बागमती प्रदेशलाई २५–२३, २५–२१ र २५–१८ ले पराजित गरेको छ ।

सोमबार दशरथ रंगशालाको कभर्डहलमा भएको खेलमा अघिल्लो संस्करणको विजेता टिपटप हेल्प नेपालले विजयी शुरूआत गर्दै बागमती प्रदेशमाथि २५–१६, २५–१३ र २५–१२ को जीत निकाल्दै ३ अंक जोडेको छ । समूह ‘ए’मा रहेको हेल्प नेपालले अघिल्लो संस्करण जस्तै यस संस्करणमा पनि भारतीय खेलाडीलाई प्राथमिकतामा राखेको छ ।

जीत निकाल्ने क्रममा भारतीय खेलाडीहरू सम्मिलित गण्डकी प्रदेशले दावाँली मिलन क्लबमाथि ३–१ को जीत निकाल्यो । दावाँली क्लबले प्रस्तुत गरेको निकै नै प्रतिस्पर्धात्मक तथा मनोरञ्जनात्मक खेलमा गण्डकीले २५–१२, २५–२२, २०–२५ र २७–२५ को जीत निकालेको छ ।