रूपन्देहीको बुटवल उपमहानगरपालिका प्रमुख (मेयर) शिवराज सुवेदीलाई पहिरो निरीक्षणका क्रममा मुक्का प्रहार गर्ने युवक गणेश पंगेनी १ हप्तापछि धरौटीमा छुटेका छन् ।

पंगेनीलाई अमर्यादित व्यवहारसम्बन्धी मुद्दा चलाइएको थियो । उनले असोज ४ गते मेयरमाथि मुक्का हानेका थिए । 

जिल्ला प्रशासन कार्यालय रूपन्देहीले उनलाई सोमवार उनी ५ हजार रुपैयाँ धरौटीमा रिहा गरेको छ । रूपन्देहीका सहायक प्रमुख जिल्ला अधिकारी विजयराज पौडेलले ईलाका प्रहरी कार्यालय बुटवलबाट पेश हुन आएको अमर्यादित व्यवहारको मुद्दा हेरेपछि प्रमुख जिल्ला अधिकारी (सीडीओ) ऋषिराम तिवारीले धरौटीमा छाडेको जानकारी दिए । ५ हजार धरौटी राखेर तारेखमा छाडिएको पौडेलले बताए ।

प्रहरीले पंगेनीलाई असोज ४ गते साँझ नै पक्राउ गरी अनुसन्धान अगाडि बढाएको थियो । तर पालिकाले पंगेनीमाथि मुद्दा नचलाउन भनेको बताइएको थियो ।

प्रहरीले घटनाको प्रारम्भिक अनुसन्धान गरी अमर्यादित व्यवहारसम्बन्धी मुद्दा बनाई जिल्ला प्रशासनमा पेश गरेको थियो । ईलाका प्रहरी कार्यालयका प्रमुख डीएसपी मदन कुँवरले घटनाको प्रकृति हेरेर जिल्ला प्रशासन कार्यालयमा मुद्दा पेश गरिएको बताए ।

‘हामीले केही दिन राखेर अनुसन्धान गरेपछि जिल्ला प्रशासनमा मुद्दा पठाएका थियौं । त्यहाँबाट धरौटीमा रिहा गरिएको छ,’ उनले भने । पहिरोले बुटवल–३ ज्योतिनगरमा २० घर पुरिएका छन् ।