भारतका कुख्यात डाँकुको समूहले नेपाली बैंक लुटेर भागेपछि यसरी परे प्रहरीको फन्दामा

उत्तम पोखरेल
उत्तम पोखरेल

पोखरेल लोकान्तर डट्कमका प्रदेश १ प्रतिनिधि हुन् ।

भारतका कुख्यात डाँकुको समूहले नेपाली बैंक लुटेर भागेपछि यसरी परे प्रहरीको फन्दामा
फाइल फोटो

सोमवार मोरङको धनपालथान गाउँपालिकास्थित कर्सिया बजारको सिटिजन्स बैंक लुटपाट घटनामा भारतीय कुख्यात डाँकु समूहको संलग्नता रहेको खुलेको छ ।


Advertisement

भारतीय प्रहरीको ‘वान्टेड’ सूचीमा रहेकाहरूबाट बैंक लुटपाटको घटना भएको जिल्ला प्रहरी कार्यालय मोरङका एसपी जनार्दन जिसीले बताए । ८ जनाको समूहमा आएका लुटेराले बैक लुटपाट गरेको प्रहरीले जनाएको छ ।


Advertisement

शुरूमा ५ जना मात्रै भए पनि जम्मा ८ जनाको संलग्नता देखिएको प्रहरीले जनाएको छ । जिसीका अनुसार मुख्य योजनाकार विराटनगरका मुनाल पथका एक पुरुष रहेको खुलेको छ ।

लुटपाटमा संलग्न अन्य सबै भारतीय नागरिक हुन् । बयानमा डाँकुहरूले एकअर्कालाई नचिनेको जनाएका छन् । एकअर्कालाई नचिने पनि मुख्य योजनाकार श्याम मुखियालाई चिनेको बताएको जिसीले जानकारी दिए । 


Advertisement

मुखियाले ऋण तिर्न भारतबाट डाँकुहरूलाई बोलाएको जनाइएको छ । ‘ऋण छ, बैंक लुटपाट गरेर बाँडेर खाउँला भनेर बोलाएको खुलेको छ,’ एसपी जिसीले भने । 

बैंक लुटपाटमा ३ जनालाई मोरङ प्रहरीले नियन्त्रणमा लिइसकेको छ । पक्राउ पर्नेमा मुख्य योजनाकार श्याम मुखिया, विजय सहनी र मुनाल यादव रहेका छन् । मुख्य योजनाकार मुखियाले ठेगाना समेत भारत भनेर ढाँटेको र पछि अनुसन्धानका क्रममा उनी विराटनगर निवासी रहेको खुलेको एसपी जिसीले बताए । 

बैंकका कर्मचारीले राति १० बजेसम्म हिसाब गरेर २१ लाख ७० हजार ५६३ रुपैयाँ नभएको जनाएका छन् । बैकबाट पैसा लुटिए पनि कति लुटिएको भन्ने अझै यकिन भई नसकेको प्रहरीले जनाएको छ ।

बैंकभित्र प्रवेश गर्दा सुरक्षा गार्ड शितल कुँवरले डाँकुहरूलाई रोक्ने प्रयास गरेका थिए । कुँवरले रोक्न खोज्दा लुटेरा समूहले पेस्तोल देखाएको थियो । कुँवर पेस्तोल खोस्ने प्रयासमा लागेपछि बैंकमा २ राउन्ड गोली फायर गरिएको थियो । १ राउन्ड गोली सुरक्षा गार्डको घाँटी पछाडि लागेको थियो भने अर्काे गोली आफ्नै साथीलाई लागेको थियो । लुटेरा समूहभित्रै आफ्नै साथीलाई गोली लागेपछि प्रहरीलाई पक्राउ गर्न सहज भएको थियो । गोलीबाट विजय सहनी घाइते भएका थिए ।

घाइतेको सहनीको तिघ्रामा गोली लागेको छ । घाइतेलाई लिएर भारततर्फ जाँदै गर्दा सीमावर्ती क्षेत्रबाट ३ जनालाई नियन्त्रणमा लिइएको मोरङ प्रहरीले जनाएको छ । भारतीय प्रहरीको सहयोगमा अन्यको खोज कार्यलाई तीव्र बनाइएको प्रहरीले जनाएको छ । घाइते गार्ड र लुटेरा समूहका सदस्यको विराटनगर र रंगेलीमा उपचार भइरहेको छ । 
 

उत्तम पोखरेल
उत्तम पोखरेल

लेखकबाट थप...

कमेन्ट गर्नुहोस्