प्रधानमन्त्री शेरबहादुर देउवाले बाढी प्रभावित नागरिकलाई तत्काल उद्धार तथा सुरक्षित स्थानमा व्यवस्थापन गर्न प्रमुख जिल्ला अधिकारी तथा सुरक्षा प्रमुखलाई निर्देशन दिएका छन् ।

बाढीबाट प्रभावित भएकालाई सरकारले राहत दिने तथा बाढी–पहिरोले घर भत्किएकाहरूको घर निर्माणका लागि आर्थिक सहयोग दिने प्रधानमन्त्री देउवाले बताए ।

उनले भने, ‘बाढी प्रभावितको स्वास्थ्य उपचारदेखि आवास निर्माणमा सरकारले सहयोग गर्नेछ, विपत्तिका बेला सबैले सहयोग गर्न आवश्यक रहेको छ, तपाईंहरूले प्रभावितलाई चुस्त रूपमा सेवा दिनुहोला ।’ 

बिहीवार बाढी प्रभावित क्षेत्र सुदूरपश्चिमको डोटी पुगेका प्रधानमन्त्री देउवाले बाढी प्रभावित क्षेत्रका व्यक्तिको उद्धार र राहातका लागि निर्देशन दिए ।

प्रधानमन्त्री देउवाको नेतृत्वमा आएको टोलीमा अर्थमन्त्री जनार्दन शर्मा, संस्कृति, पर्यटन तथा नागरिक उडड्यनमन्त्री आले एवं पूर्व मन्त्रीहरू एनपी साउँद, रमेश लेखक र वीरबहादुर बलायर छन् ।

प्रधानमन्त्री सहितको टोली बाढीबाट प्रभावित भएको सुदूरपश्चिम प्रदेशका ९ वटै जिल्लाको निरीक्षणका लागि जाने क्रममा अहिले दिपायल आइपुगेको छ । 

प्रधानमन्त्री सहितको टोली बिहीवार बिहान काठमाडौंबाट सुर्खेत हुँदै दिपायल आएको हो । टोलीले बाढीले क्षति गरेका स्थानको हवाई निरीक्षण गरेको थियो । 

प्रधानमन्त्री देउवासँगै निरीक्षणमा आएका संस्कृति, पर्यटन तथा नागरिक उडड्यनमन्त्री आलेले बाढी–पहिरोमा ज्यान गुमाएका, घरबारविहीन भएका नागरिकलाई सरकारी निकायबाट राहतसहित आर्थिक सहयोग प्रदान गर्ने निर्णय भएको बताए । उनले भने, ‘बाढी–पहिरो पीडित नागरिकको साथमा सरकार छ, पीडित भएका नागरिकको समस्या समाधान सरकारले गर्नेछ ।’

मन्त्री आलेले बाढी–पहिरोले अवरुद्ध भएका राजमार्ग तथा ग्रामीण क्षेत्रका सडक सञ्चालनका लागि सम्बन्धित मन्त्रालयमार्फत निर्देशन भइसकेकाले तत्काल काममा खटिन कर्मचारीलाई पनि आग्रह गरे ।

डोटीमा मात्रै बाढी–पहिरोका कारण १४ जनाको ज्यान गइसकेको तथा १ जना बेपत्ता भएको प्रमुख जिल्ला अधिकारी शंकरबहादुर विष्टले जानकारी दिए । सोही क्रममा प्रजिअ विष्टले जिल्लामा बाढी–पहिरोले १३ जना घाइते, ३५ चौपाया मृत्यु, २५ घाइते तथा २० चौपाया बेपत्ता, घरधुरी ११०, विस्थापित नागरिक ५०० तथा २ वटा झोलुङ्गे पुलमा क्षति भएको विवरण पेश गरेका थिए ।

बाढीको क्षतिबारे दिपायलमा जानकारी लिएर टोली बझाङ चैनपुर जाने कार्यक्रम तय भएको छ । टोलीले बझाङमा बाढी–पहिरोले गरेको क्षतिका विषयमा अनुगमन तथा निरीक्षण गरी बैतडी र डोटीको सीमा क्षेत्र ढुंगाड जाने कार्यक्रम रहेको र ढुंगाडमा भएको क्षतिका विषयमा स्थलगत निरीक्षण गरी डडेल्धुरा सदरमुकाम पुग्ने बताइएको छ । 

बिहीवारै टोली जोगबुढाबाट कञ्चनपुर पुगी सदरमुकामका साथै बाढी प्रभावित क्षेत्र दोधारा–चाँदनी, बह्मदेव क्षेत्रमा बाढीले गरेको क्षतिका बारेमा निरीक्षण अनुगमन गरी कैलालीको धनगढी फर्किने कार्यक्रम तय भएको छ ।