राजीनामा दिएर मार्ग प्रशस्त गर्न अष्टलक्ष्मीलाई जम्कट्टेलको आग्रह

काठमाडाैं
कात्तिक ४, २०७८

लोकान्तर संवाददाता

राजीनामा दिएर मार्ग प्रशस्त गर्न अष्टलक्ष्मीलाई जम्कट्टेलको आग्रह

अ अ अ

बागमती प्रदेश सभाको विपक्षी दलका नेता शालिकराम जम्कट्टेलले मुख्यमन्त्री अष्टलक्ष्मी शाक्यलाई राजीनामा दिएर मार्ग प्रशस्त आग्रह आग्रह गरेका छन ।

बागमती प्रदेश सभालाई सम्बोधन गर्दै उनले गठबन्धनले बहुमत पुर्‍याएर नयाँ मुख्यमन्त्रीको उम्मेदवार तयार गरिसकेकाले राजीनामा दिएर सहयोग गर्न आग्रह गरेका हुन् ।

सत्तारूढ दलले गठबन्धनलाई हेप्न र पेल्न खोजेको भन्दै त्यसो नगर्न उनले एमालेलाई चेतावनी समेत दिए ।

एमाले अध्यक्ष केपी ओलीका कारण राजनीतिक ध्रुवीकरणको अवस्था आएको र उनैले सत्तामा बसिरहन अनेकौं हतकण्डा अपनाउने उपाय सिकाएको जम्कट्टेलले बताए ।

सोही कारण संविधानअनुसार सरकार बसिरहन नमिल्ने अवस्थामा पनि एमालेले बागमती प्रदेश सरकारको नेतृत्व छाड्न नचाहेको उनले बताए ।

एमाले संसदीय दलका नेताले प्रदेश सभालाई डिक्टेट गर्न खोजेको भन्दै त्यसो नगर्न सचेत गराए ।

एमाले संसदीय दलका नेताले प्रदेश सभालाई फलानो दिन बैठक राख्न भन्दै पत्र पठाएर संसद् र सांसदको मानमर्दन गरेको उनले बताए ।

मुख्यमन्त्री शाक्यलाई विश्वासको मत दिन नसकिने पनि उनले बताए ।

‘बागमती प्रदेशमा गठबन्धनको स्पष्ट बहुमत छ । प्रक्रियामा जाँदा पनि उहाँको पक्षमा मत आउँदैन । तसर्थ, प्रक्रियामा जानुभन्दा पनि राजीनामा दिएर मार्ग प्रशस्त गर्नुहोस्’, जम्कट्टेलले भने ।

त्यसअघि बागमती प्रदेशका मुख्यमन्त्री अष्टलक्ष्मी शाक्यले सम्बोधन गर्दै विश्वासको मत मागेकी थिइन् ।

विश्वासको मत माग्दै उनले सरकारले गरेका कामको फेहरिस्त प्रदेश सभा बैठकमा राखेकी थिइन् ।