आईबा वर्ल्ड बक्सिङ च्याम्पियनसिपमा सहभागी बक्सिङ टोलीलाई युवा तथा खेलकुद मन्त्री महेश्वरजंग गहतराज ‘अथक’ले बिदाइ गरेका छन् ।

नेपाल बक्सिङ संघका अध्यक्ष राम अवालेको अध्यक्षतामा सिहंदरबारस्थित युवा तथा खेलकुद मन्त्रालयको सभाहलमा आयोजित बिदाइ कार्यक्रममा खेलकुद मन्त्री अथकले खेलाडी, प्रशिक्षक र टीम म्यानेजर सहितको टोलीलाई सफल यात्रा र जीतको शुभकामना दिँदै बिदाइ गरे ।

खेलकुद मन्त्री अथकले राष्ट्रिय खेलकुद परिषद् मातहत करीब २०० को हाराहारीमा खेलकुद संघहरू रहे पनि नयाँ खेलाडी ननिस्कनु र खेलकुदमा खेलाडीले आफ्नो भविष्य देख्ने वातावरण नबन्नुमा दुःख लागेको बताए ।

‘खेलाडीहरू राष्ट्रको पहिचान हो, गहना हो भन्ने र खेल पश्चात् अर्काे व्यवहार गर्ने कार्य भएकोले यसलाई रोक्दै खेलभित्रै खेलाडीको भविष्य सुनिश्चित गर्न लागिपर्छु,’ उनले भने ।

खेलाडीलाई ढुक्क भएर खेल खेल्न र विजयी बन्न शुभकामना दिँदै उनले भने, ‘तपाईंहरूको भविष्य उज्यालो बनाउन आवश्यक नयाँ कार्यक्रम ल्याउनेमा ढुक्क र विश्वस्त हुन अनुरोध गर्छु ।’

अन्तर्राष्ट्रिय बक्सिङ संघ (आईबा) को ७५ वर्षको वार्षिकोत्सवको अवसरमा सर्वियाको राजधानी बेलग्रेड शहरमा अक्टोबर २५ देखि नोभेम्बर ६ सम्म सञ्चालन हुने २१औं वर्ल्ड बक्सिङ च्याम्पियनसिपमा सहभागी हुन नेपाल बक्सिङ संघका अध्यक्ष राम अवालेको नेतृत्वमा मुख्य प्रशिक्षक प्रकाश थापामगर, प्रशिक्षक किशोर लिम्बु, अफिसीयल्समा नेपाल बक्सिङ संघका सदस्यहरू मानबहादुर भण्डारी र प्रनिर अधिकारी सहभागी हुनेछन् । 

नेपाल बक्सिङ संघले गठन गरेको छनोट समितिको प्रतिवेदन अनुसार छनोट गरिएको प्रतियोगिताबाट उत्कृष्ट ४८ केजी तौल समूहमा रविन थापा, ५७ केजी तौल समूहमा पुरन राई, ६३.५ केजी तौल समूहमा भुपेन्द्र थापा र ६७ केजी तौल समूहमा सनिल शाहीले प्रतिस्पर्धा गर्नेछन् । सहभागीमध्ये भुपेन्द्र थापा र सनिल शाही १३औं दक्षिण एशियाली प्रतियोगिताका स्वर्ण पदक विजेता हुन् ।

विश्वका १०५ राष्ट्रको १३ वटा तोल समूहमा ६५० जना खेलाडीको सहभागिता रहेको बृहत् बक्सिङ प्रतियोगिताको प्रत्येक तौल समूहमा स्वर्ण पदकको लागि १ लाख डलर, रजत पदकको लागि ५० हजार डलर र कास्य पदक जित्ने २ जनाका लागि २५/२५ हजार डलर पुरस्कारका साथै मेडल, प्रमाणपत्र र च्याम्पियनसिप वेल्टको व्यवस्था गरिएको छ । 

खेलाडी बिदाइ कार्यक्रममा युवा तथा खेलकुद मन्त्रालयका सचिव, राखेप सदस्य एकेन्द्र कुँवर, नेपाल बक्सिङ संघका उपाध्यक्ष भोजराज सिटौला, सदस्यहरू ओलम्पियन रामबहादुर गिरी, श्यामकाजी अवाले, प्रनिल अधिकारी, मुख्य प्रशिक्षक प्रकाश थापामगर,  टेक्निकल कमिटीका संयोजक तथा आईबा थ्री स्टारकोच दीपक महर्जन, ओलम्पियन तथा वरिष्ठ बक्सिङ प्रशिक्षक प्रबिन तुलाधर, आईबा वन स्टार रेफ्री रामचन्द्र थापामगर, आईबा वन स्टार रेफ्री तथा अखिल नेपाल खेलकुद महासंघका सचिव धनकुमार मैनाली, लगाएत खेल सम्बन्धि व्यक्ति र खेलाडीको उपस्थिति रहेको थियो ।

सहभागी टोलीलाई नेपाल बक्सिङ संघ उपाध्यक्ष भोजराज सिटौलाले १ जोर ट्रेक सुट, ८औं साग स्वर्ण पदक विजेता रामचन्द्र थापामगरले भेस्ट र होसन्ना चिन्नी भट्टा उद्योगले खेलाडीको रिङ ड्रेस २–२ सेट प्रायोजन समेत गरेको छ ।