दशैंको भोलिपल्ट अर्थात् असोज ३० गते तीन युवतीलाई कमलामाई–५ का तीन युवकले भेट्न बोलाए । अर्को गाउँका ती युवतीहरू र युवकबीच सल्लाह भएअनुसार लब्दाखोला नजिकै भेट भयो । 

बगरको झ्याङमा युवकहरू विवेक मगर, शिव मगर, हेम लामा र तीन युवतीबीच सहमतिमा शारीरिक सम्बन्ध भयो । तर, पछि थप ५ युवक थपिए । 

‘उनीहरूबीच यौनसम्पर्क भएको देखिन्छ । युवाहरूले त्यो कुरा प्रहरीले लिएको  प्रारम्भिक बयानमा पनि स्वीकारेका छन्,’ जिल्ला प्रहरी कार्यालय सिन्धुलीका एक अनुसन्धान अधिकारीले लोकान्तरलाई भने, ‘शारीरिक सम्बन्ध हुनुअघि आर्थिक प्रलोभनमा पारेको देखिन्छ ।’

तीन युवकसँग सहमतिमै शारीरिक सम्पर्क भए पनि थपिएका आकाश मगर, दीपक मगर, अर्जुन मगर, धनबहादुर बम्जन, मीलन लामा र विश्व राईले जबर्जस्ती गरेको युवतीहरूले प्रहरीलाई बताएका छन् । 

उनीहरूले प्रहरीलाई दिएको प्रारम्भिक बयानअनुसार विवेक, शिव र हेमले अन्य पाँच जनालाई फोन गरेर बोलाएका हुन् । 

‘८ युवकले युवतीलाई बोलाएर सामूहिक बलात्कार गरेको देखिन्छ,’ जिल्ला प्रहरी कार्यालय सिन्धुलीका प्रमुख प्रहरी उपरीक्षक (एसपी) गोविन्द थपलियाले भने, ‘त्यसपछि जबरजस्ती करणी गरेको खुलेको छ ।’

अन्य युवकले बलात्कार गर्न थालेपछि एक जना युवतीले प्रहरीलाई खबर गरेकी थिइन् । लगत्तै प्रहरी नायव उपरीक्षक (डीएसपी) मनोजकुमार लामाको टोलीले विवेक, शिव र हेमलाई पक्राउ गरेको थियो । 

त्यतिबेलासम्म अन्य युवाहरू भने बा १० च १८३६ नम्बरको स्कार्पिओ, प्रदेश २–०२–००३ प १२१० र प्रदेश २–०२–००४ प ५३७६ नम्बरको स्कार्पिओमा भागिसकेका थिए । 

प्रहरीले आकाश, दीपक, अर्जुन, धनबहादुर, मिलन र विश्वलाई कात्तिक ५ गते बर्दिवासबाट महोत्तरीको गौशाला हुँदै भारत भाग्न थालेको अवस्था पक्राउ गरेको एसपी थपलियाले बताए । 

प्रहरीका अनुसार उनीहरूलाई भगाउनमा कमलामाई नगरपालिका–५ का संजीव मगर, प्रेम श्रेष्ठ, शिव देवकोटा, सुमन थापा, मेघबहादुर श्रेष्ठ र ईश्वर आलेले सहयोग गरेका थिए ।