वर्षाका कारण अवरुद्ध सडक सञ्चालन गर्न डडेल्धुरा जिल्लाका स्थानीय पालिकाले प्रयास जारी राखेका छन् ।

गन्यापधुरा, अजयमेरु, नवदुर्गा,  भागेश्वर, आलिताल गाउँपालिकासहित अमरगढी र परशुराम नगरपालिकाका ग्रामीण सडक अवरुद्ध छन् । अवरुद्ध सडक केही सञ्चालन पनि भएका पालिकाले जनाएका छन् । 

रुवाखोला–रेल, धन्ढुंगा–बडाल, जनगलस्पा–कैलपालमाडौं र कोराल–मोइरेल सडकमा एकैसाथ चार डोजर प्रयोग गरिएको गन्यापधुरा गाउँपालिका अध्यक्ष नवलबहादुर मल्लले जानकारी दिए ।
 
अजयमेरु गाउँपालिकाले उग्रतारा–मेलौली, भल्कुडा–चिपुर, ढिमौला–भद्रपुर र बगरकोट–सेरागाँड–देवल सडक सञ्चालन गर्ने काम शुरूआत गरिसकिएको जनाएको छ । गाउँपालिका अध्यक्ष उमेशप्रसाद भट्टले वर्षाका कारण अवरुद्ध ग्रामीण सडक खुलाउन उच्च प्राथमिकता दिएको बताए । 

नवदुर्गा, भागेश्वर र आलितालले गाउँपालिकाले अवरुद्ध सडक सञ्चालन गरिरहेका जनाएका छन् ।

जिल्ला सदरमुकामस्थित अमरगढी नगरपालिकाले पोखरा–तिलाडी, डकले–सल्लघारी, घटाल–चिरकिट्टे सडक लगायत अवरुद्ध सडक खुलाउन प्रयास जारी रहेको जनाएको छ ।

प्रमुख जिल्ला अधिकारी मोहनराज जोशीले बाढीपहिरोका कारण अवरुद्ध सडक खुलाउन तथा राहत वितरणमा पालिकालाई आग्रह गरिएको बताए ।