प्रधानन्यायाधीश चोलेन्द्रशमशेर जबराको इजलासमा आज पाँच वटा मुद्दाको सुनुवाइ भएको छ । राणाले उनको एकल पूर्ण इजलासमा आज पाँच वटा मुद्दाको पेसी तोकेका थिए ।

सर्वोच्च अदालतका न्यायाधीशहरूले इजलास बहिस्कार गरिरहेका बेला प्रधानन्यायाधीश राणाले इजलास तोकेर मुद्दाको सुनुवाइ गरेका हुन् । 

राणाको इजलासमा परेको निवेदनमा सन्तोषकुमार पाण्डेको मुद्दा तामेलीमा राख्ने निर्णय गरिएको छ । उनले लुम्बिनी प्रदेशका सभामुखविरुद्ध अदालतको अवहेलना मुद्दा दर्ता गरेका थिए । 

त्यसैगरी, भूवनकुमार दाहालले मधुकुमारी चौधरीलाई विपक्षी बनाएर दर्ता गरेको सम्पत्ति शुद्धीकरणसम्बन्धी मुद्दामा निवेदन फिर्ताको आदेश राणाको इजलासबाट भएको छ । 

प्रधानन्यायाधीश राणाले अर्को दुई वटा बन्दीप्रत्यक्षीकरण मुद्दामा कारण देखाऊ आदेश जारी गरेका छन् । 

अर्को कालोबजारी तथा अन्य केही समाजिक अपराधसम्बन्धी मुद्दामा कैफियत प्रतिवेदन माग्ने आदेश राणाको इजलासबाट भएको छ । 

प्रधानन्यायाधीश राणाले आज ११ वटा इजलास तोकेका थिए । त्यसबाहेक प्रधानन्यायाधीश राणाको एकल इजलासमा मात्रै मुद्दाको सुनुवाइ भएको हो ।