नेकपा (एकीकृत समाजवादी)का अध्यक्ष माधवकुमार नेपालले प्रधानन्यायाधीश चोलेन्द्रशमशेर जबरालाई महाअभियोग लगाउने सम्बन्धमा गठबन्धन दलमा कुनै छलफल नभएको स्पष्ट पारेका छन् । 

बिहीवार पार्टी कामको सिलसिलामा धनगढीमा पुगेका अध्यक्ष नेपालले समाजवादी प्रेस संगठनले आयोजना गरेको पत्रकार सम्मेलनमा  प्रधानन्यायाधीशलाई महाअभियोग लगाउने सम्बन्धमा गठबन्धनका दलहरूबीच कुनै छलफल नभएको बताएका हुन् । 

उनले आफू निरन्तर काठमाडौं बाहिर रहेको र नेताहरू पनि व्यस्त रहेकाले पाँच दलको बैठक समेत बस्न नसकेको उल्लेख गरे । 

‘हामीले त्यो विषयमा छलफल नै गरेका छैनौँ, महाअभियोगबारे केही प्रवेश गरेको छैन,’ उनले भने, ‘हाम्रो पाँच दलको बैठक नै बस्न सकेको छैन ।’

अध्यक्ष नेपालले एमाले अध्यक्ष केपी शर्मा ओलीले न्यायपालिकामाथि अनावश्यक लाञ्छना लगाउने काम गर्दै आएको आरोप लगाए । 

‘केपी ओलीजीले साराथोक बिगार्नुभएको हो । न्यायपालिकालाई स्वतन्त्र ढंगले भूमिका निर्वाह गर्न दिनुपर्ने कुरामा उहाँले रिस आफ्नो साँध्नका लागि सबैलाई निकाल्नुपर्छ भन्ने उहाँले जुन ढंगले भूमिका खेलिरहनुभएको छ, उहाँको अत्यन्तै अनुचित, हस्तक्षेपकारी र देशको सबै सिस्टमलाई भत्काउने यो प्रवृत्तिकै उपज हो,’ उनले भने, ‘ऐतिहासिक फैसला गर्ने न्यायाधीशहरूमाथि उहाँले हटाउनुपर्छ भन्ने कुरा उठाउनुभएको छ यो अत्यन्तै नाजायज, अनुचित कुरा हो ।’

अध्यक्ष नेपालले एकीकृत समाजवादीले चुनावमा अरू पार्टीसँग गठबन्धन गर्ने पनि बताए । 

अध्यक्ष नेपालले निर्वाचन आयोगबाट कलम चुनाव चिन्ह पाइसकेको उल्लेख गर्दै हिजोको सूर्य चिन्हमा ग्रहण लागेको टिप्पणी गरे । 

उनले न्याय र सत्यको आवाज बुलन्द गर्नका लागि कलम चिन्ह नै जनताले रोज्नुपर्ने अवस्था बनिसकेको दाबी गरे ।