नेकपा एमाले पोखरा महानगर कमिटी अध्यक्षमा दिलीप न्यौपाने चयन भएका छन् ।

लामो समयको रस्साकस्सीपछि न्यौपाने बिहीवार अध्यक्षमा सर्वसम्मत भएका हुन् । 

नेतृत्वका लागि बुधवार ५ जनाको उम्मेदवारी परेको थियो । बिहीवार मतदानको समय तोकिएकोमा नेताहरूबीच छलफलपछि न्यौपानेलाई सर्वसम्मत अध्यक्ष दिइएको हो । 

लामो समयदेखि विद्यार्थी राजनीतिमा रहेर काम गरेका उनी यसअघि एमाले नगर कमिटी सचिव थिए । 

अध्यक्षका लागि उनीसहित दीपक पौडेल, तेजनारायण अधिकारी, धनबहादुर नेपाली र हरिप्रसाद त्रिपाठीबीच प्रतिस्पर्धा थियो ।

सचिवमा जीवन आचार्य सर्वसम्मत भएका छन् । गोकर्ण अधिकारीले उम्मेदवारी फिर्ता लिँदै आचार्यलाई सघाएका हुन् । 

महानगर कमिटी उपाध्यक्षमा मोहन गुरुङ र राजकुमारी भुजेलमध्ये १ जनालाई उपाध्यक्ष बनाउने प्रयास भइरहेको छ । उपसचिवमा सीता विश्वकर्र्मा र रामचन्द्र थापाको नाममा सहमति भए पनि आधिकारिक घोषणा हुन बाँकी रहेको निर्वाचन समितिले जनाएको छ ।