अमेरिका र दक्षिण कोरियाले सार्वजनिक घोषणा नगरिकनै संयुक्त अभ्यास थालेको दक्षिणका सैन्य स्रोतलाई उद्धृत गर्दै सञ्चारमाध्यमहरूले खबर दिएका छन् । 

उत्तर कोरियासँगको तनाव बढिरहेको बेलामा यस्तो गोप्य अभ्यास गरिएको हो । 

सोमवार दक्षिण कोरिया र अमेरिकाका एरियल युनिटहरूले संयुक्त युद्धाभ्यास गरेका हुन् । उत्तर कोरियाले अक्टोबर महिनाको मध्यमा पनडुब्बीबाट ब्यालिस्टिक क्षेप्यास्त्र प्रक्षेपण गरेपछि यो युद्धाभ्यास गरिएको हो । 

दक्षिण कोरियाको समाचार संस्था योन्हापले एकजना अधिकारीलाई उद्धृत गर्दै पाँचदिने अभ्यासमा दुवैतर्फबाट १०० वटा विमान परिचालन गर्ने खबर दिएको छ । दक्षिणले एफ–१५के र केएफ–१६ जेट तथा अमेरिकाले एफ–१६ विमान उडाउनेछ । 

दक्षिण कोरियाको वायुसेनाले यस अभ्यासका विषयमा थप व्याख्या गर्न अस्वीकार गरेको छ । साझेदारहरूबीचको अभ्यास वार्षिक योजनाअन्तर्गत सन्तुलित ढंगले गर्ने गरिएको उसले बतायो ।