श्रम, रोजगार एवं सामाजिक विकासमन्त्री किसान श्रेष्ठले रोजगारी आफ्नै देशमा सिर्जना गर्ने गरी आफूले मन्त्रालयको कामको थालनी गरिसकेको बताएका छन् ।

बाराको कलैयामा बुधवार नेकपा एकीकृत समाजवादी पार्टीको प्रचार विभागद्वारा आयोजित कार्यक्रममा मन्त्री श्रेष्ठले श्रमिकका लागि बारा, पर्सालाई  केन्द्रमा राखी सुविधा सम्पन्न अस्पतालको निर्माण गर्ने लक्ष्य लिएको बताए ।

अब पनि श्रमिकलाई दुःखको सामना गर्नु नपरोस् भन्ने अभिप्रायका साथ ठोस नीति निर्माण गरी उनीहरूको हकहितको संरक्षण गर्नुपर्नेमा उनले जोड दिए । प्रचार विभागका प्रमुख रमेश सुवेदीको अध्यक्षतामा सम्पन्न कार्यक्रमका मन्त्री श्रेष्ठले निर्वाचनसम्म कुनै पनि हालतमा ५ दलीय गठबन्धन कायम रहनेमा आफू आशावादी रहेको बताए ।