प्रधानन्यायाधीश चोलेन्द्र शमशेर जबराले सबै खाले मुद्दाको पेशी तोकेका छन् ।

न्यायालयमा देखिएका समस्या समाधानका लागि जबराले मार्ग प्रशस्त गर्नुपर्ने माग गर्दै आएका न्यायाधीशहरूले बन्दी प्रत्यक्षीकरण बाहेकका मुद्दा हेर्न अस्वीकार गरेपछि सोही अनुसार पेशी तोकिँदै आएको थियो ।

न्यायाधीशहरूसँग भएको भद्र सहमतिविपरीत जबराले मंगलवार सबैखाले मुद्दा पेशीमा राखेर १० वटा इजलास गठन गरेका हुन् ।

९ वटा संयुक्त इजलास तोकिए पनि जबराले आफ्ना लागि एकल इजलास गठन गरेका छन् ।

न्यायाधीशहरूले आफूसँग बेञ्च शेयर नगर्ने सन्देश पाएपछि जबराले आफ्ना लागि छुट्टै एकल इजलास गठन गरेका हुन् ।

उनले आफ्नो इजलासमा ७ वटा मुद्दालाई पेशीमा चढाएका छन् ।

यसअघि सोमवार बसेको न्यायाधीशहरूको बैठकले बन्दी प्रत्यक्षीकरणका मुद्दा मात्र हेर्ने र जबरासँग बेञ्च शेयर नगर्ने निर्णय गरेको थियो ।

प्रधानन्यायाधीशले आफ्नो अलावा दीपककुमार कार्की र नहकुल सुवेदी, मीरा खड्का र कुमार रेग्मी, हरिकृष्ण कार्की र सुष्मालता माथेमा, विश्वम्भरप्रसाद श्रेष्ठ र कुमार चुडाल, आनन्दमोहन भट्टराई र मनोजकुमार शर्मा, आनन्दमोहन भट्टराई र प्रकाशकुमार ढुंगाना, अनिलकुमार सिन्हा र प्रकाशमान सिंह राउत, सपना प्रधान मल्ल तथा बमकुमार श्रेष्ठ तथा तेजबहादुर के सी र मनोजकुमार शर्माको संयुक्त इजलास गठन गरेका छन् ।

यसमध्ये तेजबहादुर केसी र मनोजकुमार शर्माको इजलासमा बन्दी प्रत्यक्षीकरणको एउटा मुद्दा पनि राखिएको छ ।  

*प्रधानन्यायाधीश हुनुपर्नेमा भुलवश अन्यथा भएकाले सच्च्याइएको छ ।