नेकपा एमाले रूपन्देहीले कात्तिक २७ गते पार्टीका महाधिवेशन प्रतिनिधि एकसाथ छनोट गर्ने भएको छ ।

एमाले रूपन्देहीको मंगलवार बसेको बैठकले १६ हजार ३१० पार्टी सदस्यको संलग्नतामा ५ वटा प्रतिनिधिसभा निर्वाचन क्षेत्र तथा दलित पार्टी सदस्यको हकमा जिल्ला स्तरमा प्रतिनिधि छनोट गर्ने निर्णय गरेको हो । 

एमाले रूपन्देहीका प्रचार विभाग प्रमुख मोहन चापागाईंले सबै निर्वाचन क्षेत्रको तयारीका लागि जिल्ला सदस्यहरू र पालिका पदाधिकारी समेतको संयुक्त बैठक बसी निर्वाचन कमिटी गठन गर्ने र निर्वाचन केन्द्र तोक्न निर्देशन समेत दिएको जानकारी दिए । 

एमालेको १०औं महाधिवेशन आगामी मंसिर १०–१२ गतेसम्म चितवनमा हुँदैछ । प्रतिनिधि सर्वसम्मत रूपमा छनौट गर्ने प्रयास हुने चापागाईंले बताए ।

रूपन्देहीबाट करीब ३५ जना महाधिवेशन प्रतिनिधि छनोट हुने बताइएको छ । प्रनिधिनि छनोट भएपछि महाधिवेशन उद्घाटन सत्रमा जिल्लाबाट गर्नुपर्ने काममा आफूहरू केन्द्रित हुने चापागाईंले बताए ।

बैठकमा बोल्दै एमाले प्रदेश अध्यक्ष लिला गिरीले पार्टीको आन्तरिक एकतालाई बलियो बनाउँदै अगाडि बढ्नुपर्ने बताए ।