प्रधानन्यायाधीश चोलेन्द्र शमशेर जबराले फुलकोर्ट (सर्वाेच्चका न्यायाधीशकाे पूर्ण बैठक) आह्वानमा सहमति जनाए पनि बैठकमा भने सहभागी नभएको खुलेको छ ।

सर्वोच्चमा उपलब्ध अन्य १८ न्यायाधीश बैठकमा उपस्थित रहेका बेला जबरा भने आफ्नै कार्यकक्षमा रहेको सर्वोच्च स्रोतले जानकारी दियो ।

फुलकोर्ट बैठकमा प्रधानन्यायाधीशको सहभागिता अनिवार्य हुन्छ । तर जबराले बैठकले गरेको निर्णय आफूलाई मान्य हुने र आफूले हस्ताक्षर गरिदिने बताएको स्रोतको दाबी छ ।

'म बस्दा तपाईंहरूलाई अप्ठ्यारो होला, तपाईंहरू निर्णय गरेर ल्याउनुस्, म सही गरिदिन्छु,' प्रधानन्यायाधीश जबराले न्यायाधीशहरूलाई भनेको कुरा उद्धृत गर्दै स्रोतले लोकान्तरलाई जानकारी दियो ।

गोलाप्रथाबाट पेशी तोक्ने गरी नियमावली र कार्यविधि संशोधनलाई स्वीकृत गर्न फुलकोर्ट​ बैठक बसेको हो ।

सर्वोच्च अदालत नियमावली संशोधन भएसँगै पेशी तोक्ने प्रधानन्यायाधीशको विशेषाधिकार अन्त्य हुनेछ ।​ फुलकोर्टबाट नियमावली र कार्यविधि स्वीकृत भएपछि त्यसलाई राजपत्रमा प्रकाशनका लागि पठाइनेछ ।

नियमावली संशोधनको मस्यौदा प्रधानन्यायाधीशको सहभागिताविनै न्यायाधीशहरूले तयार पारेका हुन् ।

नियमावली संशोधन भएपछि आफैंले आफ्ना लागि पेशी गोलाबाट तान्ने गरी इजलासमा फर्किने तयारीमा न्यायाधीशहरू छन् ।