भारतको शिरोमणि अकाली दलका नेता तथा दिल्ली सिख गुरुद्वारा व्यवस्थापन समितिका अध्यक्ष मनजिन्दर सिंह सिरसाले बलिउड अभिनेत्री कंगना रनावतलाई कि जेल, कि मानसिक अस्पताल पठाउन माग गरेका छन् । 

‘कंगनाको बयानले उनको तल्लो मानसिकतालाई झल्काउँछ । खालिस्तानी आतंकवादीहरूका कारण तीन कृषि कानूनहरू फिर्ता लिइएको भन्नु किसानहरूप्रतिको असम्मान हो । उनी घृणाकी कारखाना हुन्,’ सिरसाले बयान जारी गरेर बताए । 

समितिले शनिवार कंगनाविरुद्ध प्रहरीसमक्ष उजुरी समेत दर्ता गरेको छ । इन्स्टाग्राममा सिख समुदायका विरुद्ध अपमानजनक भाषा उपयोग गरेको आरोप उजुरीमा लगाइएको छ । उक्त उजुरी मन्दिर मार्ग प्रहरी चौकीको साइबर सेलमा दर्ता गरिएको हो । 

सामाजिक सञ्जालमा गरिएको पोस्टमा कंगनाले जानाजान किसानहरूको विरोध प्रदर्शनलाई खालिस्तानी आन्दोलनका रूपमा चित्रित गरेको समितिको आरोप छ । 

आफ्नो इन्स्टाग्राम पोस्टमा कंगनाले लेखेकी थिइन्, ‘खालिस्तानी आतंकवादीहरूले सरकारलाई कानून फिर्ता लिन बाध्य बनाए । तर नबिर्सौं, एक महिला, भारतकी एक मात्र महिला प्रधानमन्त्रीले यिनीहरूलाई दबाएकी थिइन् । उनले यस मुलुकलाई जति कष्ट दिएको भए पनि उनीहरूलाई उनले लामखुट्टेलाई झैं किचिपिची पारेकी थिइन् र आफ्नो ज्यान समेत गुमाएकी थिइन् । तर उनले देश टुक्य्राउन दिइनन् । उनको मृत्यु भएको दशकौं बितिसकेको भए पनि यिनीहरू अहिलेसम्म उनको नाम सुन्दा काँप्छन् । यिनीहरूलाई त्यस्तै गुरु चाहिन्छ ।’