नेपाल कम्युनिष्ट पार्टी (नेकपा)का महासचिव नेत्रविक्रम चन्द (विप्लव) र माओवादी केन्द्रका नेता नारायणकाजी श्रेष्ठबीच भेटवार्ता भएको छ । 

विप्लव श्रेष्ठलाई भेट्न उनकै निवास हात्तीवन पुगेका थिए । श्रेष्ठले विप्लवलाई अंकमाल गरेर स्वागत गरेका थिए । 

माओवादी केन्द्रसँग एकता गर्न पनि सकिने अभिव्यक्ति दिएपछि विप्लवले माओवादीका नेताहरूसँगको भेटवार्ता बाक्लो बनाएका छन् । यसअघि उनले माओवादी केन्द्रका अध्यक्ष पुष्पकमल दाहाल प्रचण्डलाई पनि भेटेका थिए । 

शुरूमा कार्यगत एकता गर्ने र पछि पार्टी एकता हुन सक्ने विप्लवले बताउँदै आएका छन् । पार्टी एकताको लागि माओवादी केन्द्रले कार्यशैलीमा सुधार गर्न आवश्यक भएको विप्लवले बताउने गरेका छन् । 

माओवादी केन्द्रका अध्यक्ष प्रचण्डले पनि विप्लवसँग पार्टी एकताका लागि छलफल भइरहेको सार्वजनिक अभिव्यक्ति दिदैं आएका छन् । 

तर, आजको भेटवार्तामा भने पार्टीको एकताको विषयमा कुरा नभएको श्रेष्ठले लोकान्तरसँग बताए । 

उनले भने, ‘सार्वजनिक भएपछि उहाँ र मेरो व्यक्तिगत रूपमा भेट भएको थिएन । कम्युनिष्ट क्रान्तिकारीहरूको बीचमा आन्दोलनको बारेमा छलफल हुनु स्वाभाविक भयो । हामीले मुख्यगरी तीन विषयमा छलफल गर्‍याैं ।’

दुई नेताको भेटमा  कम्युनिष्ट पार्टीहरूको वैचारिक स्पष्टताको विषयमा अध्ययन, अनुसन्धान, छलफल, बहस चलाउने बारेमा छलफल भएको श्रेष्ठले बताए । 

‘नेपाली क्रान्तिलाई र समाजवादलाई केन्द्रबिन्दुमा राखेर वैचारिक स्पष्टता र विकासको निम्ति कम्युनिष्ट आन्दोलनभित्रका सबै शक्तिहरूको बीचमा अध्ययन, अनुसन्धान, छलफल, बहस गरेर विचारको स्पष्टता र विकासको निम्ति काम गर्नुपर्‍यो भन्ने बारेमा छलफल भयो’, श्रेष्ठले भने । 

त्यसैगरी, देश र जनताको तात्कालिक मुद्दा र राजनीतिक विषयहरूमा सकरात्मक हस्तक्षेप गर्न के गर्न सकिन्छ भन्ने बारेमा पनि भेटमा छलफल भएको श्रेष्ठले बताए । 

‘राजनीतिक विषयहरूमा सकरात्मक हस्तक्षेप गर्न क्रान्तिकारी कम्युनिष्ट पार्टीहरूको बीचमा सहकार्य, कार्यगत एकता गर्न, नीतिगत रूपमा सहकार्य गरेर जान सकिन्छ भन्ने बारेमा हाम्रो छलफल भयो’, उनले भने । 

त्यसैगरी भेटको अवसरमा विप्लव नेतृत्वको नेकपाले सरकारसँग गरेको सम्झौता कार्यन्वयन नभएको र त्यसलाई कार्यान्वयनका लागि माओवादी केन्द्रको तर्फबाट पहल गरिदिनका लागि पनि विप्लवले भनेको श्रेष्ठले बताए । 

‘तपाईंहरू पनि सरकारसँग कुरा गर्नुस्, हामी पनि पहल गर्छौं भनेको छु’, श्रेष्ठले भने ।