जुरी नेपालले भन्यो- बारको माग सम्बोधन गर्दै सर्वोच्च अदालतको गतिरोध अन्त्य गर

काठमाडाैं
मंसिर ५, २०७८

लोकान्तर संवाददाता

जुरी नेपालले भन्यो- बारको माग सम्बोधन गर्दै सर्वोच्च अदालतको गतिरोध अन्त्य गर

अ अ अ

जुरी नेपालले नेपाल बार एशोसियसनले राखेका मागहरू अविलम्ब सम्बोधन गर्न माग गरेको छ ।

आइतवार प्रेस विज्ञप्ति जारी गर्दै जुरी नेपालले बारको मागलाई सम्बोधन गर्न न्यायिक नेतृत्व असफल भएकाले न्यायालयमा निरन्तर गतिरोधको अवस्था सिर्जना हुनु दुःखद भएको जनाएको हो ।

‘न्यायपालिकाको नेतृत्वकर्ताको हैसियतले प्रधानन्यायधीशले वर्तमान दुर्भाग्यपूर्ण स्थितिको जिम्मेवारी लिएर नेपाल बार एशोसियसनको मागलाई अबिलम्ब सम्बोधन गरी सर्वोच्च अदालतका न्यायाधीश हरिकृष्ण कार्की नेतृत्वको समिति एवं त्यसपूर्वका विभिन्न समिति/आयोगहरूले दिएका सिफारिससमेतको आधारमा न्यायपालिकाको समष्टिगत (होलिस्टिक) सुधारका लागि मार्गप्रशस्त गर्न न्याय तथा अधिकार संस्था (जुरी–नेपाल) जोडदार माग गर्दछ,’ प्रेस विज्ञप्तिमा भनिएको छ ।

यस्तै जुरी नेपालले प्रधानन्यायधीशको राजीनामा माग गर्दै बार एशोसिएशनले सर्वोच्च अदालत परिसरमा गर्दै आएको शान्तिपूर्ण धर्नामा नेपाल प्रहरीले अनुचित शक्ति प्रयोग गरेको र अवाञ्छित व्यक्तिहरूले आन्दोलनरत कानून व्यवसायीहरूलाई धम्क्याएकोमा भत्र्सना पनि गरेको छ ।

विज्ञप्तिमा भनिएको छ, ‘घटनाहरूको स्वतन्त्र छानविन गरी दोषीमाथि यथोचित कानूनी कारवाही गर्न, त्यस्ता घटनाहरू पुनः दोहोरिन नदिन तथा शान्तिपूर्ण धर्ना तथा प्रदर्शनलाई दमन गर्न हतियारसहितका प्रहरी बलको अनुचित परिचालन रोक्नका लागि पनि नेपाल सरकारसँग जुरी–नेपाल माग गर्दछ ।’