नेपाली कांग्रेसका उपसभापति विमलेन्द्र निधिले कांग्रेस सभापतिमा उम्मेदवारी घोषणा गरेका छन् ।

बिहीवार काठमाडौंमा पत्रकार सम्मेलनको आयोजना गरी निधिले औपचारिक रूपमा सभापतिको उम्मेदवारी घोषणा गरेका हुन् ।

निधिले आगामी निर्वाचनमा कांग्रेसलाई पहिलो पार्टीको रूपमा स्थापित गर्न उम्मेदवारी दिन लागेको बताए । 

यसअघि केही महिनाअगावै पार्टी सभापतिमा उम्मेदवारी दिने बताएका थिए । ‘५३ वर्ष नेपालको लोकतान्त्रिक आन्दोलनमा खर्च गरेको छु । महाधिवेशनबाट कांग्रेस सभापतिको हैसियतले देश, जनता र पार्टीको सेवा र समर्पण गर्न चाहन्छु,’ निधिले भने । 

सभापतिमा उम्मेदवारी घोषणा गरे पनि निधिले प्यानल भने घोषणा गर्न सकेका छैनन् । उम्मेदवारी घोषणा कार्यक्रममा होमनाथ दाहाल लगायत केही नेता र महाधिवेशन प्रतिनिधि सहभागी थिए ।

लामो समयदेखि सभापति शेरबहादुर देउवासँग सहकार्य गर्दै आएका निधिले चौधौं महाधिवेशनमा देउवालाई चुनौती दिन थालेका छन् ।