नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेकपा एमालेको दशौं राष्ट्रिय महाधिवेशनको अतिथि बन्न चितवन नजाने भएका छन् । 

एमालेले प्रचण्डलाई महाधिवेशनको उद्घाटन समारोहमा अतिथिको रूपमा निम्ता गरेको थियो । 

तर प्रचण्ड भोलि मंसिर १० गते काभ्रेपलाञ्चोक जिल्लाको खानीखोला गाउँपालिकामा माओवादी केन्द्रले आयोजना गरेको कार्यक्रममा सहभागी हुन जाने भएका छन् । 

एमालेको निम्तो मानेर प्रधानमन्त्री शेरबहादुर देउवा, जनता समाजवादी पार्टीका अध्यक्ष उपेन्द्र यादव, लोकतान्त्रिक समाजवादी पार्टीका अध्यक्ष महन्थ ठाकुर लगायतका नेता एमाले महाधिवेशनको उद्घाटन सत्रमा सहभागी हुने निश्चित भएको एमाले प्रचार विभाग प्रमुख योगेश भट्टराईले बताएका छन् । 

तर माओवादी अध्यक्ष पुष्पकमल दाहाल ‘प्रचण्ड’ भने आउने/नआउने निश्चित नभएको एमालेले बताएको छ । ‘हामीले उहाँलाई निम्ता गरेका छौं । चितवन उहाँको निर्वाचन क्षेत्र भएको जिल्ला पनि हो । उहाँ आउनुहोला भन्ने अपेक्षा गरेका छौं,’ भट्टराईले भने । 

तर माओवादी केन्द्रका अध्यक्ष प्रचण्ड भने खानीखोला गाउँपालिकाको दोस्रो सम्मेलनमा सहभागी हुन काभ्रे जाने भएका छन् । खानीखोला गाउँपालिकाको ताल्ढुंगामा मंसिर १० गते अपराह्न साढे १२ बजे प्रचण्डले अधिवेशन उद्घाटन गर्ने कार्यक्रम रहेको माओवादी स्रोतले बताएको छ । 

यता एमालेको दशौं राष्ट्रिय महाधिवेशन अध्यक्ष केपी शर्मा ओलीले दिउँसो १२ बजे उद्घाटन गर्दैछन् । 

एमालेले नेकपा एकीकृत समाजवादी पार्टीबाहेक अन्य सबै राजनीतिक दलका शीर्ष नेतालाई महाधिवेशनको उद्घाटन सत्रमा अतिथिको रूपमा सहभागी हुन निमन्त्रणा गरेको एमालेको केन्द्रीय कार्यालय सचिव शेरबहादुर तामाङले बताए ।