नेपाली कांग्रेसको १४औं महाधिवेशन अन्तर्गत मोरङमा शुक्रवार जिल्ला अधिवेशनका लागि मनोनयन दर्ता हुँदैछ ।

कांग्रेसको उर्वरभूमि मानिएको मोरङमा जिल्ला नेतृत्व हत्याउनका लागि नेताहरू महिनौंदेखि बालुवाटारदेखि कोइराला निवाससम्म धाइरहेका थिए । 

अब सभापतिमा डिकबहादुर लिम्बू र दिलिप गच्छदारबीच प्रतिस्पर्धा हुने पक्का भएको कांग्रेसका नेताहरू बताउँछन् ।

१३औं अधिवेशनमा देउवा प्यानलबाट जिल्ला सभापति जितेका डिकबहादुर लिम्बू यसपटक शेखर कोइराला प्यानलबाट उठ्ने भएका छन् । उनले आफू जिल्ला सभापतिमा उम्मेदवारी दिने बताएका छन् । संस्थापन समूहबाट दिलिप गच्छदारले उम्मेदवारी दिने भएका छन् । उनले सामाजिक सञ्जालमा उम्मेदवारी घोषणा गरिसकेका छन् ।

उनी यसअघि पार्टीको जिल्ला उपसभापति र श्रम राज्यमन्त्री समेत भइसकेका हुन् । यदु विष्ट र नागेश कोइराला तथा खडग फागो पनि सभापतिका आकांक्षी देखिएका छन् । बिष्ट नेता कृष्णप्रसाद सिटौला पक्षका हुन् भने फागो र कोइराला संस्थापन इतरका हुन् ।

बहालवाला सचिव रहेका कोइरालाले विराटनगर महानगरपालिकाको मेयरको ‘बार्गेनिङ’का लागि मात्रै सभापतिमा उठ्ने चर्चा गरेको उनी निकट एक नेताले लोकान्तरलाई बताए । 

उर्लावारी नगरपालिकाका मेयर खड्ग फागोको चर्चा रहे पनि उनले उम्मेदवारी दिने/नदिने टुंगो लागिसकेको छैन । फागो नेताहरूसँग छलफल गरिरहेका उनी निकट स्रोतले जनाएको छ । 

धेरै जनाको नाम आए पनि संस्थापन पक्ष र कोइराला पक्ष भएर चुनावी मैदानमा जाने निश्चित रहेको जिल्लास्तरीय एक नेताले बताएका छन् ।