नेपाल बार एसोसिएसनका पदाधिकारीहरूले संवैधानिक परिषद्को बैठक बसेर प्रधानन्यायाधीश चोलेन्द्रशमशेर जबराको राजीनामा माग गर्न प्रधानमन्त्री शेरबहादुर देउवालाई आग्रह गरेका छन् ।

प्रधानमन्त्री निवास बालुवाटारमा भेट गरेर प्रधानन्यायाधीश जबरामाथि महाभियोग लगाउनका लागि १७ वटा आधारसहितको ज्ञापन पत्रसमेत बारले प्रधानमन्त्रीलाई  बुझाएको छ । 

नेपाल बार एसोसिएसनका अध्यक्ष चण्डेश्वर श्रेष्ठले उक्त ज्ञापन पत्र प्रधानमन्त्री देउवालाई बुझाएका हुन् ।

भेटवार्तामा सहभागी वरिष्ठ अधिवक्ता तथा बारका पूर्व महासचिव रमणकुमार श्रेष्ठका अनुसार महाभियोग प्रस्ताव दर्ता गर्नुभन्दा पनि संवैधानिक परिषद्को बैठक बसेर प्रधानन्यायाधीश जबराको राजीनामा माग गर्न आग्रह गरिएको हो ।

'उक्त बैठक बसेर पहिले तपाईंहरूले राजीनामा माग्नुस् भन्यौं, त्यहाँबाट पनि नभए महाभियोगको प्रस्ताव दर्ता गर्नका लागि १७ वटा आधारसहितको ज्ञापन पत्रसमेत बुझायौं,' श्रेष्ठले लोकान्तरसँग भने ।

गठबन्धनको सरकार भएकाले गठबन्धनमा नै यस विषयमा छलफल गरेर निर्णय लिइने प्रधानमन्त्री देउवाले जवाफ दिएको  श्रेष्ठले बताए । 

भेटवार्तामा बारका पदाधिकारीले जबरालाई प्रधानन्यायाधीशको रूपमा स्वीकार नगर्ने, बाँकी १९ जना न्यायाधीशहरूले समेत जबराको बेन्च शेयर नगर्ने भएकाले छिटोभन्दा छिटो निकासका लागि पहल गर्न देउवालाई आग्रह गरेका थिए ।