शनिवार शुरू हुने बन्दशत्रको लागि शुक्रवार बस्ने भनिएको एमाले केन्द्रीय कमिटीको बैठक राति १० बजेसम्म अझै शुरू हुन सकेको छैन ।

सौराहाको एक होटलमा राति ८ बजे बैठक बस्ने भनिएको थियो । कतिपय केन्द्रीय सदस्य र पदाधिकारी सौराहा पुगिनसकेका कारण बैठक शुरू हुन नसकेको हो । 

एमाले सचिव गोकर्ण विष्टले शुक्रवार राति अबेरसम्म भएपनि केन्द्रीय कमिटीको बैठक बस्ने लोकान्तरलाई जानकारी दिए ।

शुक्रवार शुरू एमालेको दशौं महाधिवेशनको बन्दशत्र शनिवार बिहान शुरू हुँदैछ । आजको बैठकमा पदाधिकारीको संख्या थप गर्ने तथा केन्द्रीय कमिटीको संख्या बढाउने प्रस्ताव आउन सक्ने अर्का एक केन्द्रीय सदस्यले लोकान्तरलाई जानकारी दिए । 

सचिव विष्टले पदाधिकारीको संख्या थपेर भएपनि सर्वसम्मत नेतृत्व चयन गर्नुपर्ने महाधिवेशन प्रतिनिधिको भावना रहेको बताए । अध्यक्षमा उम्मेदवारी दिने घोषणा गरेका उपाध्यक्ष भीम रावलले भने पदाधिकारीको संख्या थप गर्नेबारे पार्टीमा कुनै प्रस्ताव नआएको बताए । 

रावलले अध्यक्षमा प्रतिष्पर्धा गर्न आफू तयार रहेको र उम्मेदवारी दिने बताए । शुक्रवार दिउसो भव्य समारोहबीच एमाले अध्यक्ष केपी शर्मा ओलीले एमालेको दशौं महाधिवेशन उद्घाटन गरेका थिए ।