नेकपा एमालेको दशौं महाधिवेशनको दोस्रो दिन शनिवार बन्दशत्र शुरू हुँदैछ । 

चितवनको सौराहमा बन्दशत्र शुरू हुन लागेको हो । बिहान १० बजे शुरू हुने भनिए पनि सवा ११ बजेसम्म शुरू भएको छैन । 

एमाले पार्टी कार्यालयका सचिव शेरबहादुर तामाङले अहिले केहीबेरमा बन्दशत्र शुरू हुने लोकान्तरलाई जानकारी दिए । बन्द शत्रको शुरूमा अध्यक्ष केपी शर्मा ओलीले सम्बोधन गर्ने तयारी गरेका छन् । 

ओलीको सम्बोधनपछि विदेशी प्रतिनिधिलाई शुभकामना मन्तव्य राख्न दिइने एमाले सचिव योगेश भट्टराईले जानकारी दिए । त्यसपछि विधान संशोधन प्रस्ताव पारित गर्ने कार्यसूची छ । 

शुक्रवार मध्यरातमा बसेको एमाले केन्द्रीय कमिटी बैठकले पदाधिकारीको संख्या बढाउने, पोलिटब्युरो कमिटी बनाउने तथा केन्द्रीय सदस्यको संख्या थप गर्ने निर्णय गरेको थियो । केन्द्रीय कमिटी बैठकले गरेको निर्णयलाई विधान संशोधनको रुपमा बन्दशत्रमा लगिने नेताहरूले बताएका छन् । 

नेतृत्वमा सर्वसम्मति कायम गर्न भन्दै एमालेले उपाध्यक्षको संख्या ७ र उपमहासचिवको संख्या ३ बनाउने निर्णय गरेको थियो । 

दशौं महाधिवेशनलाई एकताको महाधिवेशनको रुपमा परिभाषित गरेको एमालेले नेतृत्वमा सर्वसम्मतिको प्रयास गर्ने कोसिस भइरहेको छ । 

सर्वसम्मतिको प्रयास भए पनि आकांक्षीलाई उम्मेदवारी मनोनयन गर्न दिनेबारे छलफल चलिरहेको स्रोतले बतायो । ‘अहिलेसम्म धेरैले उम्मेदवारी घोषणा गरेका छैनन्, कसको आकांक्षा के मा छ भनेर बुझ्न पनि उम्मेदवारी मनोनयन खुल्ला गर्ने भन्नेबारे छलफल चलिरहेको छ,’ एमालेका एक प्रशावशाली नेताले लोकान्तरसँग भने । 

अहिलेसम्म उपाध्यक्ष भीम रावलले अध्यक्षमा उठ्ने घोषणा गरेका छन् भने अन्य शीर्ष नेता मौन बसेका छन् । लालबाबु पण्डितले उपाध्यक्ष र महेश बस्नेतलगायत केही नेताले सचिवमा आकांक्षा देखाए पनि धेरैले मुख खोलेका छैनन् । 

केन्द्रीय कमिटी बैठकबाट पदाधिकारीको संख्या थप गर्ने निर्णय हुनुअघि सौराहमा पत्रकारसँग कुरा गर्दै रावलले आफू अध्यक्षको प्रतिष्पर्धाबाट पछि नहट्ने बताएका थिए । 

दशौं महाधिवेशन उद्घाटन मन्तव्यका क्रममा ओलीले आगामी पाँच वर्षका लागि दिशानिर्देश गर्नको लागि एकताबद्ध पार्टी बनाउनु पर्ने बताएका थिए । 

बन्दशत्र शुरू हुनुअघि सौराहामा ओलीलाई सर्वसम्मत अध्यक्ष बनाउन केही कार्यकर्ताले नाराबाजी गरेका थिए ।