पदाधिकारीको संख्या बढाउने सहमतिपछि पनि नेतृत्वमा सहमति जुट्न नसक्दा एमाले महाधिवेशनको बन्दशत्र शुरू हुन ढिला भएको छ । 

शनिवार बिहान १० बजे नै शुरू गर्ने भनिएको बन्दशत्र मध्यान्ह साढे १२ बजेसम्म शुरू हुन सकेको छैन । बन्दशत्र शुरू हुनुअघि अध्यक्ष केपी शर्मा नेता ओलीले प्रभावशाली नेताहरूबीच छलफल गरेका थिए । 

सहमतिको प्रयासस्वरुप नेताहरूबीच छलफल भए पनि सहमति जुट्न नसकेको स्रोतले बतायो । वरिष्ठ उपाध्यक्षमा ईश्वर पोखरेल र सुवास नेम्वाङले दाबी गरिरहेका छन् । 

महासचिवका लागि उपमहासचिव विष्णु पौडेलको नाममा सहमति जुटाउने प्रयास भइरहेको स्रोतले बतायो । स्थायी कमिटी सदस्य शंकर पोखरेलले पनि सो पदमा दाबी गरिरहेका छन् । 

अध्यक्षमा उम्मेदवारी दिने घोषणा गरेका भीम रावलसँग पनि सहमति जुट्न नसकेको एमाले स्रोतले बतायो । ओली निकट एक नेताले साँझसम्ममा सहमति जुट्ने दाबी गरे । 

पदाधिकारीको संख्या थप गर्ने निर्णय अघिसम्म रावलले आफूले उम्मेदवारी दिने अडान राखेका थिए । जति भोट आए पनि उम्मेदवारीबाट पछि नहट्ने उनले निकटस्थसँग बताएका छन् । 

बन्द शत्रको शुरूमा अध्यक्ष केपी शर्मा ओलीले सम्बोधन गर्ने तयारी गरेका छन् । 

ओलीको सम्बोधनपछि विदेशी प्रतिनिधिलाई शुभकामना मन्तव्य राख्न दिइने एमाले सचिव योगेश भट्टराईले जानकारी दिए । त्यसपछि विधान संशोधन प्रस्ताव पारित गर्ने कार्यसूची छ । 

शुक्रवार मध्यरातमा बसेको एमाले केन्द्रीय कमिटी बैठकले पदाधिकारीको संख्या बढाउने, पोलिटब्युरो कमिटी बनाउने तथा केन्द्रीय सदस्यको संख्या थप गर्ने निर्णय गरेको थियो । केन्द्रीय कमिटी बैठकले गरेको निर्णयलाई विधान संशोधनको रुपमा बन्दशत्रमा लगिने नेताहरूले बताएका छन् । 

नेतृत्वमा सर्वसम्मति कायम गर्न भन्दै एमालेले उपाध्यक्षको संख्या ७ र उपमहासचिवको संख्या ३ बनाउने निर्णय गरेको थियो । 

दशौं महाधिवेशनलाई एकताको महाधिवेशनको रुपमा परिभाषित गरेको एमालेले नेतृत्वमा सर्वसम्मतिको प्रयास गर्ने कोसिस भइरहेको छ ।