नेपाली कांग्रेस रूपन्देहीको सभापतिमा रामकृष्ण खाँण चयन भएका छन् ।

खाँणको बाहेक कसैको पनि उम्मेदवारी नपरेपछि उनी निर्विरोध भएका हुन् । रामकृष्ण गृहमन्त्री तथा कांग्रेसका प्रभावशाली नेता बालकृष्ण खाँणका सहोदर भाइ हुन् ।

गृहमन्त्री खाँणले लामो समय जिल्लामा अड्डा जमाएर आफ्ना भाइलाई नै जिल्ला कांग्रेसको नेतृत्व दिलाएका हुन् । रामकृष्ण दुई कार्यकाल कांग्रेस रूपन्देहीको सचिव भएका थिए । 

त्यस्तै उपसभापतिमा पनि थानेश्वर घिमिरे र अनिता ढुंगाना शाह निर्विरोध भएका निर्वाचन अधिकृत भेषराज घिमिरेले लोकान्तरलाई जानकारी दिए । 

घिमिरे वरिष्ठ नेता रामचन्द्र पौडेल गुटका हुन भने खाँण र ढुंगाना संस्थापन पक्ष निकट मानिन्छन् ।

ढुंगाना सार्वजनिक लेखा समितिका सभापति तथा रूपन्देही क्षेत्र नम्बर ५ का प्रतिनिधि सभा सदस्य भरत कुमार शाहकी पत्नी हुन् । सचिव सहित अन्य सबै पदमा पनि निर्विरोध चयनको प्रयास जारी छन् । 

कांग्रेसको क्षेत्रीय अधिवेशनमा कांग्रेस संस्थापन समूहले वरिष्ठ नेता रामचन्द्र पौडेल समूहका उम्मेदवारहरूलाई नै कुटपिटमा उत्रिएका थिए ।