चीनले कमनवेल्थका ४२ वटा मुलुकहरूमा ६८५ अर्ब पाउन्डभन्दा बढी रकम लगानी गरेर प्रभाव बढाएपछि बेलायत आत्तिएको छ । 

कमनवेल्थ भनेको बेलायतले पहिले उपनिवेश बनाएका मुलुकहरूको समूह हो ।

सन् २००५ देखि अहिलेसम्म चीनले त्यति धेरै रकम लगानी गरेको हो । विश्वशक्ति बन्ने चीनको आकांक्षालाई यसले प्रतिबिम्बित गरेको छ । 

बेलायतका परराष्ट्रनीति विश्लेषकहरूले बेलायत दशकौंदेखि सुतेर बसेको अनि चीनले क्यारिबीयन र अन्य ठाउँमा रहेका कमनवेल्थ राज्यहरूमा प्रभाव बढाइरहेको आरोप लगाएका छन् । 

बार्बेडोस र जमैका जस्ता गरीब मुलुकहरूमा विशाल रकम लगानी गरेर बेइजिङले उनीहरूलाई ऋणको आहालमा डुबाउने र ऋण फिर्ता गराउन सम्पत्तिलाई धरौटीमा राख्न लगाउने आरोप बेलायतका विश्लेषकहरूले लगाएका छन् । 

महत्त्वपूर्ण जलमार्गहरूका बन्दरगाहमा नियन्त्रण कायम गरेर चीनले अमेरिका र भारतलाई चुनौती दिन खोजिरहेको छ । 

अमेरिकन इन्टरप्राइज इन्स्टिच्युटले संकलन गरेको आँकडाअनुसार चीनले बार्बेडोसमा सडक, घर, नाला र होटेल बनाउनका लागि ५० करोड पाउन्ड लगानी गरेको छ । 

बार्बेडोस कुनै बेलामा बेलायतको उपनिवेश थियो । अहिले ऊ बेलायतको प्रभावबाट उम्केर गणतन्त्र बन्न लागेको छ । 

नजिकैको अर्को मुलुक जमैकामा बेइजिङले लगभग २.६ अर्ब पाउन्ड लगानी गरेको छ जबकि उक्त मुलुकको कुल गार्हस्थ्य उत्पादन नै १६.४ अर्ब पाउन्ड छ । 

कमनवेल्थका सदस्य मुलुकहरूले हङकङमा चीनले ल्याएको सुरक्षा कानूनको समर्थन गरेका थिए ।