बाइडन ह्वाइट हाउसले यस वर्षको क्रिसमस ट्रीका लागि १ लाख ३० हजार डलर खर्च गरेपछि चर्को आलोचना भएको छ ।

अमेरिकामा महंगी दिनदिनै बढ्दै गएर जनता हायलकायल भएको बेलामा ह्वाइट हाउसले क्रिसमस समारोहका लागि थप १ लाख ७१ हजार डलर खर्च गर्ने भएको छ । 

संघीय सरकारले यस वर्षको क्रिसमस समारोह निकै भव्य रूपमा मनाउने व्यापक तयारी गरिरहेको छ । क्रिसमस ट्रीमा बत्ती बाल्नेदेखि विभिन्न कलाकारहरूलाई गीत गाउन लगाउनेसम्मका आयोजना गरिनेछ । 

पोहोर साल कोभिडका कारण क्रिसमस समारोह भर्चुअल माध्यमबाट मनाइएको थियो भने यसपटक पहिलेपहिलेको जस्तो भव्य गरी मनाइनेछ । 

तर महंगी बढेर ६.२ प्रतिशत पुगिरहेकाले अमेरिकामा आधारभूत वस्तु र सेवाको मूल्य ह्वात्तै बढेको छ । यस्तो बेलामा ह्वाइट हाउसले पैसाको खोलो बगाउनु अपमानजनक भएको आलोचकहरूको भनाइ छ ।