सर्वोच्च अदालतमा मंसिर १५ गतेदेखि गोला प्रणाली लागू हुने गरी गरिएको सर्वोच्च अदालत नियमावली संशोधन नेपाल राजपत्रमा प्रकाशित गरिएको छ।

सोमबार नेपाल राजपत्रमा प्रकाशित गरिए पछि अब आगामी मंसिर १५ गते देखि गोला प्रथा लागू हुने भएको हो।

'सर्वोच्च अदालतको पूर्ण बैठकको निर्णय बमोजिम सर्वोच्च अदालत (दोस्रो संशोधन) नियमावली,२०७८  संवत् २०७८ मंसिर १५ गते देखि प्रारम्भ हुने गरी तोकेकोले सूचना प्रकाशन गरिएको छ,' सोमबार प्रकाशित नेपाल राजपत्रमा उल्लेख छ।

यस अघि प्रधानन्यायाधीशले नै आफ्नो तजबिजको आधारमा मुद्दाको पेशी तोक्दै आएका थिए।

सर्वोच्च अदालतका १८ जना न्यायाधीशहरूले प्रधानन्यायाधीश चोलेन्द्र शमशेर जबराले तोकेको पेशीलाई गत कार्तिक ८ गते देखि अवज्ञा गर्दै आएका थिए। जबराले मुद्दाको पेशी तोक्दा बेन्च शपिंग भएको भन्दै १८ जना न्यायाधीशहरूले जबरा माथि गम्भीर प्रश्न उठाउँदै अवज्ञा गर्दै आएका थिए।

गोला प्रणाली मंसिर १५ गतेदेखि लागू हुने भए पनि प्रधानन्यायाधीशले गोला तान्न नहुने, उनले गोला ताने पनि कुनै न्यायाधीशले बेन्च शेयर नगर्ने न्यायाधीशहरूबीच समझदारी कायम भएको छ।

उता प्रधानन्यायाधीशले मुद्दाको सौदाबाजी गर्दै कार्यपालिकासँग भागबण्डा माग गर्नुका साथै मुद्दामा आर्थिक लेनदेन गर्दै आएको गम्भीर आरोप लगाउदै नेपाल बार एसोसिएसनले जबराको राजीनामा माग गर्दै १ महिना देखि आन्दोलित छन्।

न्यायालयको नेतृत्व नै आर्थिक लेनदेनमा संलग्न रहेकाले जबराले आफ्नो पदबाट राजीनामा नदिए सम्म आन्दोलन जारी रहने बारले भन्दै आएको छ।