सर्वोच्च अदालतको इतिहासमा पहिलोपटक आज गोलाप्रथा प्रणालीबाट मुद्दाको पेशी तोकिएको छ ।

इजलास गठन र पेशी तोक्ने प्रधानन्यायाधीशको तजबिजी अधिकार अन्त्य गर्दै गोलाप्रथाबाट पेशी तोकिएको हो ।

आफ्ना लागि पेशी रोज्न न्यायाधीशहरूले अपारदर्शी थैलीमा राखिएको गोला थुतेका छन् । गोलाप्रथाबाट बुधवार ११ वटा इजलास गठन भएको छ ।

न्यायाधीशहरू मीरा खड्का र कुमार चुडालका लागि एकल इजलासमा पेशी तोकिएको छ ।

यसैगरी न्यायाधीशहरू दीपककुमार कार्की र​ टंकबहादुर मोक्तान, हरिकृष्ण कार्की र सुष्मालता माथेमा, हरिकृष्ण कार्की र​ वमकुमार श्रेष्ठ, विश्वम्भरप्रसाद श्रेष्ठ र​ वमकुमार श्रेष्ठ, आनन्दमोहन भट्टराई र मनोजकुमार शर्मा, अनिलकुमार सिन्हा र कुमार रेग्मी, प्रकाशमान सिंह राउत र हरिप्रसाद फुयाल, सपना प्रधान मल्ल र प्रकाशकुमार ढुंगाना तथा तेजबहादुर केसी र नहकुल सुवेदीको संयुक्त इजलास गठन भएको छ ।

प्रधानन्यायाधीश चोलेन्द्र शमशेर जबराले 'बेञ्च शपिङ' गरेको भन्दै न्यायाधीशहरूले जबराले तोकेको इजलास बहिष्कार गर्दै अवज्ञा आन्दोलन गरिरहेका थिए ।

गोला प्रणाली लागू भएपछि न्यायाधीशहरू अब सबै किसिमको नियमित मुद्दा हेर्न इजलासमा फर्किएका छन् ।

कात्तिक ८ गतेदेखि न्यायाधीशहरूले बन्दी प्रत्यक्षीकरण, तामेली, मुद्दा फिर्तालगायत सीमित मुद्दा मात्र हेर्दै आएका थिए ।