नेपाल बार एसोसिएसन र सर्वोच्च अदालत बार एसोसिएसनले कायममुकायम प्रधानन्यायाधीश नतोकिएको कारण देखाउँदै बेञ्च नबस्न न्यायाधीशहरूलाई आग्रह गरेका छन् ।

दुवै बारका पदाधिकारीले बुधवार न्यायाधीशहरूलाई भेटेर कायममुकायम प्रधानन्यायाधीश नतोकिई गठित इजलासमा नबस्न ध्यानाकर्षण गराएका हुन् ।

'प्रधानन्यायाधीश अनुपस्थित रहेकाले कायममुकायम स्वत: तोकिनुपर्ने हो,' न्यायाधीशहरूसँगको भेटपछि सर्वोच्च बारका अध्यक्ष पूर्णमान शाक्यले भने, 'न्यायालय नेतृत्वविहीन हुन सक्दैन । गोलाप्रथाबाट तोकिएको पेशी रुजु गर्नका लागि पनि वरिष्ठतम् न्यायाधीशलाई कायममुकायम प्रधानन्यायाधीश तोकिनुपर्छ भनेर हामीले भन्यौं ।'

संविधानको धारा १२९ (६) अनुसार कामु प्रधानन्यायाधीश तोकेर मात्र सुनुवाई अगाडि बढाउनुपर्ने बारको तर्क छ ।

उक्त धारामा भनिएको छ–

प्रधान न्यायाधीशको पद रिक्त भएमा वा कुनै कारणले प्रधान न्यायाधीश आफ्नो पदको काम गर्न असमर्थ भएमा वा बिदा बसेको वा नेपालबाहिर गएको कारणले प्रधान न्यायाधीश सर्वोच्च अदालतमा उपस्थित नहुने अवस्था भएमा सर्वोच्च अदालतको वरिष्ठतम् न्यायाधीशले कायममुकायम प्रधान न्यायाधीश भई काम गर्नेछ ।

बेञ्च नबस्न बारले आग्रह गरेपछि न्यायाधीशहरू छलफलमा जुटेका छन् । केही न्यायाधीश इजलासमा पुगिसके पनि अहिले सबै न्यायाधीशबीच सामूहिक छलफल भइरहेको छ ।

प्रधानन्यायाधीश चोलेन्द्र शमशेर जबरा केही दिनदेखि अनुपस्थित छन् । कोरोना संक्रमण भएकाले एपीएफ अस्पतालमा उनको उपचार भइरहेको छ ।