भारतको ब्रोडकास्ट अडियन्स रिसर्च काउन्सिलले विगत पाँच हप्ताको रेटिङ सार्वजनिक गरेको छ । 

त्यसमा द कपिल शर्मा शो, बिग बोस, केबीसी र द बिग पिक्चर कुनै पनि शीर्ष १० स्थानमा छैनन् ।

यहाँ हामी द कपिल शर्मा शोमा मात्र फोकस गर्नेछौं ।

केही समय ब्रेक लिएर पुनः आएको कपिलको शोमा पुराना कलाकार र नयाँ कन्सेप्ट आउने चर्चा चलेको थियो । तर कपिलले आफ्नो कन्टेन्टमा कुनै नयाँपन ल्याउन सकेका छैनन् ।

एउटै खालको स्टोरीलाइन र उस्तै किसिमका टिप्पणीहरू हुनाले दर्शकले यसमा कुनै नयाँ कुरा भेटेका छैनन् । 

बलिउडका सेलेब्रिटीहरू नियमित रूपमा शोमा पुगेर ग्ल्यामर छर्ने गरे पनि संवादहरू बासीपुराना नै हुने गरेका छन् । 

अर्चना पूरण सिंहलाई शोमा निकै उडाइने गरिन्छ । कपिलले अर्चनाको शरीरको मर्दको जस्तो भनी जोक गरिरहन्छन् । उनलाई कुर्सीमा बसिरहने अनि पर्दापछाडिको दृश्य आफ्नो इन्स्टाग्राम अकाउन्टमा राखेर पैसा कमाउने भनी उडाइरहिन्छ । 

कपिलका साथै कृष्णा अभिषेक, किकु शारदा र सुदेश लाहिडीले अर्चनाभन्दा नवजोत सिंह सिद्धू सही भएको बताउने गरेका छन् । सिद्धूको नाम अनावश्यक रूपमा लिने गरिएको छ । अर्चनाले आफूमाथिका सबै जोकलाई हाँसेर सहने गरेकी छन् । 

कपिलले कलाकारहरूसँग पैसाको कुरा झिक्ने गरेका छन् । अक्षय कुमार र दिव्या खोसला कुमारसँग उनले पैसा धेरै भएको भनी जोक गर्दा उनीहरूले चित्त नबुझाएको देखिएकै हो । 

चन्दन प्रभाकर र सुमोना चक्रवर्तीलाई क्षमता नभएका कलाकार भनी शोमा मजाक उडाउने गरिएको छ । अनि शोका संगीतकारहरूलाई पनि कपिलको साथी भएको नाताले काम दिइएको भनी मजाक उडाउने गरिन्छ । 

सहकलाकारको शरीरको मजाक उडाउने काम पनि बाक्लैसँग हुने गरेको छ । किकु शारदाको मोटो शरीर र सुमोना चक्रवर्तीको ठूलो ओठको मजाक उडाउने गरिन्छ । महिलालाई जोकमार्फत अपमान गर्ने गरिएको भनी मुकेश खन्नाले आलोचना समेत गरेका थिए । 

यी कारणहरूले गर्दा सन् २०२२ मा कपिल शर्माको शो बन्द भएर त्यसको ठाउँमा कुनै रियालिटी शो सोनीले ल्याउने हल्ला चल्न थालेको छ ।