नेकपा एमालेका नवनिर्वाचित उपाध्यक्ष विष्णु पौडेलले लुम्बिनी गुरूयोजना छिट्टै पूरा गर्न आग्रह गरेका छन् । गुरूयोजना बनेको ४० वर्ष हुँदा समेत पूरा हुन सकेको छैन । 

लुम्बिनी बौद्ध विश्वविद्यालयको १७औं वार्षिकोत्सवमा बिहीवार बोल्दै नेता पौडेलले गुरूयोजना पूरा नहुँदा लुम्बिनीको सोचेजस्तो विकास हुन नसकेको भन्दै छिट्टै गुरूयोजना पूरा गर्नतर्फ लाग्न सरकार र लुम्बिनी विकास कोषलाई आग्रह गरे ।

थालिएका कामहरू छिट्टो सम्पन्न गर्नतर्फ सबैको ध्यान पुग्नुपर्ने नेता पौडेलको भनाइ छ । 

लुम्बिनीसँगै तिलौराकोट, रामग्राम, देवदहको पनि संरक्षण र प्रवद्र्धन गर्न आवश्यक रहेको पौडेलले बताए । उनले भने, ‘रामग्राम, देवदह, लुम्बिनी र तिलौराकोटलाई समेटेर बृहत् गुरूयोजना बनाएर लुम्बिनी विकास गर्न आवश्यक छ ।’ 

पौडेलले भैरहवामा निर्माणको अन्तिम चरणमा पुगेको गौतमबुद्ध अन्तर्राष्ट्रिय विमानस्थलनको दोस्रो चरणको निर्माण कार्य छिटो शुरू गर्न आग्रह समेत गरे ।

विमानस्थलको पहिलो चरणको निर्माण कार्य अन्तिम चरणमा पुगेर परीक्षण उडानको तयारीमा छ । ‘गौतमबुद्ध विमानस्थलमा ‘फस्ट फेज’को काम सकेर उद्घाटन गर्ने बेलामा सेकेन्ड फेजको शुरू गर्नुपर्छ । त्यसका लागि एसियाली विकास बैंक तयार छ,’ पौडेलले भने । 

पूर्व अर्थमन्त्री समेत पौडेलले लुम्बिनीलाई आकर्षक शैक्षिक गन्तव्यका रूपमा विकास गर्नुपर्ने बताएका छन् । ‘विश्वविद्यालय बौद्ध शिक्षामा दुनियाँले विश्वास गर्ने, आकर्षक वैज्ञानिक र स्वदेश तथा विदेशले चाहेको श्रमबजारमा खपत हुनसक्ने जनशक्ति विश्वविद्यालयले उत्पादन गरोस्,’ उनले भने ।

विश्वविद्यालयको विकासमा पूर्ववर्ती सरकारले जस्तै अहिलेको सरकारले पनि तत्परता देखाउन पौडेलले आग्रह गरेका छन् ।