राष्ट्रिय प्रजातन्त्र पार्टी (राप्रपा)को अध्यक्षमा निर्वाचित राजेन्द्र लिङ्देनले आज चावहिलस्थित कार्यालयमा गएर पदभार ग्रहण गरेका छन् ।

पदभार ग्रहणका लागि उनले यसअघिका अध्यक्ष कमल थापाले प्रयोग गर्दै आएको अध्यक्षको कार्यकक्ष प्रयोग गरेनन् । 

आफू पार्टीको महामन्त्री हुँदा बस्ने गरेको कार्यकक्षमा नै उनले अध्यक्षको पदभार ग्रहण गरेका हुन । आफ्नो चाहना र योजनामा नै अध्यक्षको नयाँ कार्यकक्ष तय गरिएको उनले बताए ।

‘म राष्ट्रिय प्रजातन्त्र पार्टीमा मेरा श्रद्धेय नेताहरू बसेकै कुर्सीमा बसौं र म पनि त्यहाँ बसेर इच्छा पूरा गरौं, दुनियाँलाई देखाऔं भन्ने रहरले अध्यक्ष पदको दाबी गरेर आएको मानिस होइन,’ लिङ्देनले भने, ‘त्यहाँ फेरि पनि हाम्रा अध्यक्षत्रयहरू, हाम्रा नेताहरू र खासगरी जहाँ कमल थापा बस्दै हुनुहुन्थ्यो, त्यहाँ फेरि पनि उहाँ हाम्रो अभिभावकको रूपमा, नेताको रुपमा आउनुपर्छ, सजिलो होस् भनेर त्यो कोठालाई सुरक्षित राखेको हो ।

लिङ्देनले अगाडि भने, ‘नेताहरूलाई अभिभावकको रूपमा आउन र बस्न सजिलो होस् भनेर यसअघि उहाँहरूले प्रयोग गर्दै आएको कार्यालय सुरक्षित राखिएको हो ।’

यद्यपि थापाले कार्यकक्ष नछाड्ने बुझेपछि लिङ्देनले झमेला गर्न नचाहेको राप्रपा स्रोतले बतायो । राप्रपाको चाबहिल र धुम्बाराहीमा गरी दुईवटा कार्यालय छन् । 

राप्रपा विभाजन भएका बेला ती कार्यालयहरू बनेका थिए । पार्टी एकीकरण भएपछि चाबहिलको कार्यालयमा कमल थापा बस्दै आएका थिए ।

लिङ्देनले अहिले कमल थापाले प्रयोग गर्ने उक्त कार्यालय नचलाई अध्यक्षको नयाँ कार्यकक्ष तयार गरेका हुन् । 

लिङ्देनको पदभारको क्रममा पूजापाठ गरेर धुपबत्ती बालिएको थियो ।