गुण्डागर्दी गरेर रकम असुली गरेको भन्दै प्रहरीले दुई जनालाई पक्राउ गरेको छ । 

काठमाडौंको पानीपोखरीस्थित युनिभर्सल इन्टरनेसनल मेनपावर कम्पनीका सञ्चालकलाई धम्क्याएर रकम असुलेको भन्दै काठमाडौं महानगरपालिका–७, गंगाहिटी घर भई हाल सुकेधारा बस्ने ४० वर्षीय मिलन जोशी र दोलखा भीमेश्वर–५, माटी घर भई काठमाडौं बालुवाटार बस्ने रविन्द्र बस्नेतलाई प्रहरीले पक्राउ गरेको हो । 

आफूहरू यस क्षेत्रको दादा भएको र मेनपावरले विदेश पठाएका व्यक्तिबाट लिएको रकममध्ये कम्तीमा प्रतिव्यक्ति २४ हजार रूपैयाँका दरले कमिसन दिनुपर्ने नत्र मेनपावर चल्न नदिने भन्दै रकम असुलेको प्रहरीको भनाइ छ । प्रहरीका अनुसार हालसम्म ९० लाख २५ हजार रकम लिएको खुलेको छ । 

लकडाउनका कारण मेनपावर नचलेको अवस्थामा उनीहरूले सञ्चालकसँग कमिसन र दशैँ खर्च एकमुष्ट मागेका थिए । मंसिर १६ गते उनीहरू मेनपावर कम्पनीमा आएर सञ्चालक, सञ्चालकका पत्नी र कर्मचारीहरूलाई ज्यान मार्ने धम्की दिएर थप रकम मागेको प्रहरीले जनाएको छ । 

सञ्चालकले रकम दिन नसकेपछि हातपातसमेत गरेको सूचना पाएपछि उनीहरूलाई आइतवार दिउँसो काठमाडौंको मित्रपार्कबाट महानगरीय अपराध महाशाखाको टोलीले पक्राउ गरेको हो । 

उनीहरूलाई ‘आपराधिक लाभ लिएको कसूर’ मुद्दामा कारवाहीका लागि महानगरीय प्रहरी परिसर टेकु पठाइएको महशाखाले जनाएको छ ।