युक्रेनले सोमवार आफ्नो सेना दिवसको अवसरमा अमेरिकी हतियार देखाएर शक्तिप्रदर्शन गरेको छ । 

त्यस अवसरमा युक्रेनका राष्ट्रपति भोलोदीमीर जेलेन्स्कीले रुसको आक्रमणविरुद्ध लड्न युक्रेनी बलहरू सक्षम रहेको बताए । 

युक्रेनी सीमानजिक रुसले लगभग एक लाख सैनिकहरू र भारीभरकम हतियार तैनाथ गरेको छ । 

दुई देशबीचको तनाव घटाउनका लागि अमेरिकाका राष्ट्रपति जो बाइडनले रुसी समकक्षी भ्लादिमिर पुटिनसँग कुराकानी गर्ने भएका छन् । 

रुसले युक्रेनमाथि आक्रमण गर्न लागेको भनी अमेरिकाले भाष्य निर्माण गरिरहँदा रुसले चाहिँ युक्रेनले आक्रमणको तयारी गरिरहेको बताएको छ । 

युक्रेनी सेना आफ्नो शक्तिमा विश्वास गर्ने र शत्रुको योजनालाई विफल पार्ने युक्रेनका राष्ट्रपति जेलेन्स्कीले बताए । 

जारी तनावका बीच राष्ट्रपति जेलेन्स्की युक्रेनी हितयारको निर्माणका लागि प्रसिद्ध शहर खार्किव जानेछन् । त्यहाँ उनले युक्रेनी सेनालाई ट्यांक र सशस्त्र गाडीहरू सुम्पिनेछन् ।

उनले दोनेत्स्क क्षेत्रको पनि भ्रमण गर्नेछन् । त्यहाँ युक्रेनी सेना रुस समर्थित पृथक्तावादीहरूसँग लडिरहेका छन् । दोनेत्स्क क्षेत्रमा सन् २०१४ देखि अहिलेसम्म १४ हजार मानिस मारिएका छन् ।