नेपाली कांग्रेसको केन्द्रीय सदस्यमा पाल्पाका नेता नेता वीरबहादुर रानाले उम्मेदवारी दिने घोषणा गरेका छन् । 

लुम्बिनी प्रदेशका ऊर्जा, जलस्रोत तथा सिँचाइमन्त्री समेत रहेका नेता रानाले बुटवलमा मंगलवार पत्रकार सम्मेलन गरी केन्द्रीय सदस्यमा उम्मेदवारी दिने घोषणा गरेका हुन् । 

कांग्रेसका संस्थापनइतर समूहका राना पाल्पा कांग्रेसको दुई कार्यकाल सभापति भएका नेता हुन् । उनले पार्टीको जिल्लामा दुई कार्यकाल नेतृत्वमा हाँकेकोले १४ औं महाधिवेशनमा जनजाति तर्फबाट केन्द्रीय सदस्यमा उम्मेदवारी दिने घोषणा गरेको बताए । 

कांग्रेसको १४ औं महाधिवेशन यहीँ मंसिर २४ गतेदेखि काठमाडौंमा शुरू हुँदैछ । पाल्पामा रानाको राम्रो पकड छ । आफू नेतृत्वमा पुगेपछि कांग्रेसमा नीतिगत सुधार गर्न प्रयास थाल्ने बताए । 

‘म नेतृत्वमा पुगेँ भने पार्टीलाई विधि, पद्धति र विधानअनुसार चलाउने प्रयास गर्नेछु । पार्टीमा अनुशासन, मूल्यांकन र आर्थिक पारदर्शिता कायम गर्ने परिपाटीको व्यवस्था गर्नेछु,’ उनले आफ्नो प्रतिबद्धतामा भनेका छन् । 

कांग्रेस कार्यकताले आफूलाई भारी मतका साथ विजयी गराउनेमा आफू विश्वस्त रहेको बताए ।