नेपाली कांग्रेसमा वरिष्ठ नेता रामचन्द्र पौडल नेतृत्वको संस्थापनइतर समूहबाट सभापतिको साझा उम्मेदवार तय गर्न दबाब दिँदै चाक्सीबारीस्थित नेता प्रकाशमान सिंहको घरमा कांग्रेसका युवा नेताहरूले प्रदर्शन गरेका छन् ।

नेपाली कांग्रेसको १४औं महाधिवेशनमा सभापतिको साझा उम्मेदवार बनाउने सम्बन्धमा संस्थापनइतर समूह नेता सिंहको घरमा बैठक बसिरहेको समयमा मंगलवार आधा दर्जन बढीको संख्यामा भेला भएका युवा नेताहरूले साझा उम्मेदवारको विकल्प नभएको भन्दै प्रदर्शन गरेका हुन् ।

प्रदर्शनमा सहभागी नेपाल विद्यार्थी संघका पूर्व सहमहामन्त्री टेकराज पौडेलले कांग्रेसलाई एकतावद्ध बनाएर महाधिवेशनलाई एकताको महाधिवेशन बनाउन माग गर्दै आफूहरूले प्रदर्शन गरेको बताए ।

नेताहरूले त्याग गरेर भए पनि पार्टीलाई एकतावद्ध बनाएर अगाडि लानुको विकल्प नभएको उनको भनाई छ । उनले भने, ‘पार्टी सभापतिदेखि सबैमा एकताको प्रयास गर्नु छ । कांग्रेसलाई सकेसम्म एकताबद्ध बनाएर यो महाधिवेशनमा एकताको महाधिवेशनको रूपमा अगाडि बढाउनुस् भन्ने हाम्रो चाहनाले आज हामी यहाँ उपस्थित भएका हौं । देशभरका कार्यकर्ताको एकतावद्ध होस् भन्ने चाहाना छ । त्यसलाई मनन गरेर उहाँहरूले त्याग पनि गर्न सक्नुपर्छ र एकतावद्ध बनाएर अगाडि लानुको विकल्प छैन ।’

युवा नेताहरूले ‘एकता मात्रै जीतको आधार हो, साझा उम्मेदवारको विकल्प छैन, अहिले नमिले कहिले मिल्ने, नेताहरू मिल्नुस्, कांग्रेस जोगाउनुस्, कांग्रेस जोगाउने कि कुर्सी ?’ लेखिएको प्लेकार्ड प्रदर्शन गर्दै बैठकमा उपस्थित नेताहरूलाई हस्तान्तरण गरेका थिए ।