सहमतीय प्रक्रियाबाट २ सय ३६ सदस्यीय केन्द्रीय समिति चयन गर्दै नेकपा माओवादी केन्द्रको ८ औं महाधिवेशन समापन भएको छ । पुस ११ गते शुरु भएको महाधिवेशन नयाँ केन्द्रीय सदस्य चयन गर्दै आइतवार समापन भएको हो । बाँकी केन्द्रीय सदस्य र पदाधिकारी भोलि बस्ने केन्द्रीय समिति बैठकले चयन गर्ने नेता कृष्णबहादुर महराले जानकारी दिए ।

अध्यक्ष पुष्पकमल दाहाल प्रचण्डले प्रस्ताव गरेको केन्द्रीय कमिटीमा अधिकांश पुरानै अनुहार छन् । प्रचण्डले प्रस्ताव गरेको केन्द्रीय सदस्यको सूचीमा नारायण दाहाल, रेणु दाहाल र बिना मगरको पनि नाम समावेश छ । नारायण नातामा प्रचण्डका भाइ हुन् । भरतपुर महानगरकी मेयर समेत रहेकी प्रचण्डपुत्री रेणु यसअघि पनि केन्द्रीय सदस्य थिइन् ।

जनजाति क्लस्टरबाट केन्द्रीय सदस्य बनेकी बिना प्रचण्डकी बुहारी हुन् । प्रचण्डपुत्र स्व. प्रकाश दाहालकी पत्नी रहेकी बिना कञ्चनपुरबाट प्रत्यक्ष निर्वाचित सांसद समेत हुन् । माओवादीले पदाधिकारी भने भोलि बस्ने केन्द्रीय कमिटी बैठकबाट तय गर्ने प्रवक्ता महराले जानकारी दिए ।