प्रधानमन्त्री शेरबहादुर देउवा र नेकपा एमाले अध्यक्ष केपी शर्मा ओलीबीच शनिवार बालकोटमा छलफल भएको छ । प्रधानमन्त्री देउवा ओलीसँग संसद अवरोध खुलाउने र एमसीसीका विषयमा छलफल गर्न बालकोट पुगेका थिए । 

उनीहरूबीच झण्डै एक घण्टा एक्लाएक्लै वार्ता भएको थियो । 

ओलीसँग छलफल सकारात्मक भएको र निष्कर्षमा पुग्न छलफललाई निरन्तरता दिइने देउवाका स्वकीय सचिव भानु देउवाले जानकारी दिए । 

भेटबारे ओलीले भने सार्वजनिक गर्नुपर्ने विशेष महत्त्वको कुरा नभएको प्रतिक्रिया दिएका थिए । 

एमालेले कारवाही गरेको भनिएका १४ जना सांसदको पद रिक्त भएको सूचना प्रकाशन नगरेर सभामुखले पार्टी विभाजनमा सहयोग गरेको भन्दै त्यसको विरोधमा एमालेले संसद अवरोध गरिरहेको छ । 

यसै विषयमा यसअघि देउवाले बोलाएको सर्वदलीय बैठकमा पनि ओली सहभागी भएका थिएनन् । शुक्रवार सत्ता गठबन्धनको बैठकले ओलीसँग यस विषयमा छलफल गर्न प्रधानमन्त्री देउवालाई जिम्मा दिएको थियो ।