सरकारले कडाइ गरेसँगै सुन र चाँदीको आयात ह्वात्तै घटेको छ । भदौमा मासिक करीब ५० हजार किलो आयात हुने गरेको चाँदी मंसिरमा जम्मा ५ हजार किलोमा झरेको अर्थ सचिव मधु मरासिनीले जानकारी दिए ।

उनका अनुसार साउनमा ३१ हजार ६००, भदौमा ४९ हजार ९५२, असोजमा ४४ हजार ७०७, कात्तिकमा २४ हजार २० र मंसिरमा ५ हजार किलो चाँदी आयात भएको छ । 

सरकारले आयातमा कडाइ गरेकै कारण सुन आयातमा पनि सुधार आएको उनले बताए । नेपालीले बाहिरबाट ५० ग्राम ल्याउन पाइने सुनमा कडाइ गरेकै कारण अवैध सुन आयात नियन्त्रणमा आएको बताए । 

उनका अनुसार सरकारले २० जनाको टास्क फोर्स बनाएरै सुन आयातमा कडाइ गरिएको छ, जसकारण १५५ किलो सुन वैध बाटोबाट आएको छ । 

५० ग्राम सुन बाला जस्तो बनाएर ल्याउने गरेको पाइएपछि सरकारले कडाइ गरेको बताए । नियन्त्रण गर्नुअघि राष्ट्र बैंकले आयात गर्न दिएको दैनिक २० किलोको कोटा भए पनि एकै दिन २१.५ किलोसम्म सुन आयात भएको पनि मरासिनीले जानकारी दिए । 

मरासिनीका अनुसार सरकारले चाँदी र सुन आयातमा कडाइ गरेकै कारण यसमा हुने खर्च समेत घटेको छ ।